Пандемия қайталана ма? «Омикрон» тіркелген елдерден 2,9 мың жолаушы келген

Алматыдағы эпидемиялық ахуалға келсек, соңғы 7 күнде КВИ дерті өткен апталармен салыс­тырғанда 249 оқиғадан 223 жағ­дайға дейін төмендеп, тәулігіне 30-35 адамнан індет табылып жа­тыр. Желтоқсан айында Алма­ты­да 1000-1300 адам індетке шал­ды­ғу мүмкіндігі болжанса, 22 желтоқ­санға дейін 884 жағдай тіркелді.

Алматыда КВИ дертінің тө­мен­деуіне ұжымдық иммунитетті 58,4%-ға көтеру айтарлықтай кө­мек­тескен. Қала әкімі Бақытжан Са­ғын­таев: «Алматыны жаппай вак­ци­налау қажет. Өйткені қала­лық сан­эпидқызметтің талдау тобы маман­дарының болжамы бойынша, Алматыда COVID-19 «омикрон» штамының тіркелуі әбден мүмкін. Эпидемияның кезекті толқыны 2022 жылғы қаңтардың ортасында күті­луде, наурыз айының ортасына қарай өршуі ықтимал», деді.

Өйткені 3-20 желтоқсан ара­лығында Алматыға шетелден 49,4 мың жолаушысы бар 344 рейс қонды. Оның ішінде ПТР анықта­ма­ларымен – 29,7 мың, вакциналау паспортымен – 20 мың, «омик­рон» штамы тіркелген елдер­ден 2,9 мың жолаушы келген. Барлығы ме­дициналық бақылауға алынып, 7 күн бойы оқшаулан­са, олар­­дың арасында КВИ-мен ­ауы­ра­тын 5 науқас анықталды. Жо­лау­шылардың 90%-ы Герма­ния, ­Мы­сыр мен Ұлыбритания­дан ­ке­леді, ал бұл елдерде індеттің жаңа түрі табылғаны аян.

Алматының бас санитарлық дәрі­гері Жандарбек Бекшин орта мерзімді болжамды жариялап, соған сәйкес COVID-19 «омикрон»-нұсқасы эпидемиясының кезекті тол­қыны болатынын айтты. 2022 жыл­дың қаңтар айының ортасынан бастап «омикрон» «дельта» нұсқасын біртіндеп ауыстырып, өрши бастайтын көрінеді. Бесінші толқынның шыңы алдағы жылдың наурыз айының ортасында болуы мүмкін. Сондай-ақ соңғы аптада 60 жастан асқан егде адамдар арасында жұқтырғандардың үлесі 80%-ды құрайтыны белгілі болды. Инфекцияның негізгі орындары – қоғамдық көлік (36%), сауда нысандары (34%) және отбасылардағы байланыстар (25%).

Алматы қаласы білім басқар­масының басшысы Ләззат Жыл­қыбаева: «Білім беру ұйымдарын­да санитарлық-эпидемиологиялық қ­а-
­уіпсіздікті қамтамасыз ету мәсе­лесі ерекше бақылауда. Барлық балабақшалар, мектептер мен колледждер Ashyq жобасына қосылып, қажетті мөлшерде дезинфекциялық және антисептикалық құралдармен қамтамасыз етілген», деді.

«Балабақшалар жыл бойы жұ­мыс істейтінін ескере отырып, қыс­қы мерекелер қарсаңында біз ата-аналар арасында балаларды бақылау қажеттілігі және олар­дың денсаулық жағдайы туралы түсіндіру жұмыстарын күшей­теміз. Барлық балабақшада таңер­теңгі сүзгі жұмыс істейді, ауру және ЖРВИ белгілері бар балалар топтарға жіберілмейді», дейді Л.Жылқыбаева.

Жыл басынан бері Алматыдағы балабақшаларда 122 бала COVID-19-бен ауырып, балалар індет жұқ­тырғаны анықталған топтарда екі апталық карантин жарияланды. Қазір қалада оқушылардың
95%-ы офлайн (287 955 адам) және 5%-ы онлайн оқиды. Күн сайын қа­­шықтан оқыту форматында 15 155 оқушы білім алады. Оқу жылы бас­талғаннан бері 3 869 оқушы коро­навируспен ауырды, олардың 2 376-ы офлайн оқыды. Науқастар қашықтан оқытуға көшірілді.

Алматыда қазір 585 700 доза вакцина, оның ішінде Спутник-V – 33 756, QazVac – 50 009, Vero Cell – 223 755 және 277 987 – Pfizer вакциналары бар, үшінші вакцинаны 45 503 алматылық алды.

АЛМАТЫ