АХҚО-ның ресми сайтындағы мәліметке сүйенсек, былтыр қаржы орталығындағы компаниялар 7 млрд теңге салық төлеген. Бұл 2020 жылғы көрсеткіштен 32 пайызға көп. Ал орталықтың бюджеттік өтінімі 2021 жылғы 11,8 млрд теңгеден осы жылы 9,9 млрд теңгеге азайды. Демек, АХҚО Мемлекет басшысының өзін өзі ақтау деңгейіне шығу туралы тапсырмасын орындап жатыр.
АХҚО коронавирус пандемиясы кезінде ел экономикасына инвестиция тартудың бірден-бір тиімді құралы болғанын жақсы білеміз. Бұл ретте АХҚО құрылғаннан бері орталық арқылы 6 млрд доллар инвестиция тартылған. Оның 4,3 млрд доллары – тікелей инвестиция, 1,7 млрд доллары – портфельді инвестиция.
AIX биржасы арқылы тартылған үлескерлік капитал көлемі 321 млн долларға, қарыз капиталы 1,4 млрд долларға тең. AIX биржасындағы сауда көлемі 298,5 млн долларды құрады. 2020 жылмен салыстырғанда көрсеткіш 5 есе жоғары. Қазақстанмен байланысы бар компаниялардың нарықтық капиталдандырылуы үшін AIX Qazaq Index (AIXQI) ашылғанын атап өткен жөн.
АХҚО коммерциялық және азаматтық дауларды шешуге арналған беделді һәм тиімді алаң тұрғысынан да танылып үлгерді. Шешілген даулардың жалпы саны – 898. Оның ішінде 20 іс АХҚО соты арқылы, 878 іс Халықаралық төрелік орталығы арқылы шешілген.
Қаржы орталығы активтерді басқару тұрғысынан әлемдік ірі компанияларды тартуда. Мәселен, бүгінде мұнда 24 инвестициялық компания мен 6 инвестициялық қор тіркелген. Басқарудағы активтердің (AUM) жалпы құны 736 млн долларға, консультациядағы активтердің (AUA) көлемі 1,26 млрд долларға тең.
Орталық бөлшек инвестициялауды дамытуға да айтарлықтай үлес қосып жатыр. Айталық, Tabys қосымшасы арқылы биржалық ноталарға салынған инвестиция көлемі 2,5 млн долларға жетті. Қосымшада 15 мыңнан астам есепшот тіркелген.
АХҚО еліміздің мемлекеттік органдарымен бірлесіп, жемісті әрекет етуде. Бұл ретте Қаржы қызметтерін реттеу жөніндегі комитет, Ұлттық банк және Қаржы нарығын реттеу және дамыту агенттігі бірлесіп дайындаған АХҚО-да валюталық реттеу және ақпарат алмасу ережелерінің қабылдануын атап өтуге болады.
Инвесторлармен жұмыс сапасын арттыру үшін KAZAKH INVEST ұлттық компаниясы мен АХҚО қызметкерлерінен Task Force арнайы органы құрылғаны мәлім. Оның міндеті – инвестициялық жобалармен жұмыс істеу, құрылымдаудан бастап жобаны іске асырғанға дейін қажетті көмекті көрсету.
АХҚО ESG жобаларды іске асыруда ел ішіндегі және өңірдегі көшбасшылардың біріне айналды. Осы орайда тұрақты қаржыландыру құралдарының нарығы 200 млн доллардан асты.
AIX биржасында шығарылған «жасыл» және әлеуметтік облигациялар көлемі 38,4 млрд теңгеге тең болды. АХҚО-ның «Жасыл» қаржы орталығы арқылы тартылған инвестиция көлемі 67,9 млрд теңгені құрады. 2021 жылдың қыркүйек айында алғашқы «жасыл» несие (Halyk Bank) мақұлданды. Бұдан бөлек, үшжылдық әлеуметтік облигациялар («Еуразия даму банкі») листингі өтті.
АХҚО – стартаптар мен жаңа технологияларды дамытудың өңірлік орталығы. Былтыр АХҚО Fintech Hub Дүниежүзілік экономикалық форумы төртінші өндірістік революциясының аффилирленген орталығының белсенді араласуымен АХҚО Tech Hub болып өзгерді. 2021 жыл басынан бері АХҚО алаңында аталған сала бойынша қол қойылған инвестициялық келісімшарттар көлемі 4,5 млн доллардан, венчурлік инвестиция көлемі 7,5 млн доллардан асады. Venture Rocket Eurasia атты краудфандинг платформасы ашылды. Қазіргі таңда Okoo (Қазақстан) мен BILLZ (Өзбекстан) стартаптары онда фандрайзинг кампанияларын құрып жатыр. Сонымен қатар АХҚО қатысушысы Namba Group (Қырғызстан) MOST Ventures Fund жеке венчурлік қорының көмегімен 1 млн доллар инвестиция тартқанын атап өткен абзал. Mastercard пен Интернет бастамаларды дамыту қоры (Ресей) бірлесіп екінші деңгейлі банктерге арналған қаржы технологиясы акселераторын ашты. Оның алғашқы қатысушылары қатарында Еуразиялық банк, Altyn Bank және Freedom Finance Bank бар.
АХҚО Қазақстанда жұмыс істеп, өмір сүретін шетелдіктерге де қызмет көрсететіні белгілі. 2021 жылы АХҚО Экспат орталығы шетелдік сарапшылар мен инвесторларға 15 мың қызмет көрсеткен. Экспаттар үшін жеке менеджер қызметі ашылғанын да айта кетелік.
