– Өкінішке қарай, қазақ киносының негізін қалаушылардың біразы бақилық болып, бүгінде орны ортамызда ойсырап тұр. Біз олардың есімін құрметтеп, болашақ ұрпаққа дәріптеуіміз керек. Олардың есімдері жұлдыз иеленіп жатқанына шын жүректен қуаныштымын, баршаңызға зор денсаулық тілеймін, – деген Қазақстанның Еңбек Ері, КСРО халық әртісі Асанәлі Әшімов барша киногерлерді бірлікке шақырды.
Жұлдыздар аллеясы, ең алдымен, Қазақстанның ұлттық мәдениетіне, әсіресе, қазақ кино өнерінің өркендеуіне өлшеусіз еңбек сіңірген Олжас Сүлейменовтің есімімен толықты. Ақынның шығармашылық өмірбаяны киномен бірге өрілді: «Қазақфильм» киностудиясының бас редакторы, Қазақ КСР Мемлекеттік киносының төрағасы қызметін атқарды. Қазақ киносының алтын қорына енген Ш.Аймановтың «Атамекен» фильмі Олжас Сүлейменовтің сценарийі бойынша түсірілді. Сондай-ақ Олжас Сүлейменовтің тікелей қолдауымен «ұлттық киноның жаңа толқыны» кино әлемінің есігін ашты.
Қазақ киносындағы тұңғыш дыбыс режиссерлерінің бірі Қадыр Қосай мен Қазақ КСР-ның еңбек сіңірген әртісі, «Қыз Жібек» фильмінде басты рөлді сомдаған Меруерт Өтекешева да өз жұлдызын ашты. Естелік-жұлдыз 2017 жылы өмірден озған актер, Қазақстанның халық әртісі Құман Тастанбековке де берілді. Оның жұлдызын Асанәлі Әшімов ашты.
Сонымен қатар биыл жазда мезгілсіз өмірден озған режиссер Сатыбалды Нарымбетовтің есімі де жұлдыздар аллеясынан өз орнын тапты. Оның туындылары Қазақстанның даңқын дүние жүзіне асқақтатты, тарихтың қатпарларын ашты, өткенге тағзым жасай отырып болашаққа сеніммен қарауға шақырды. С.Нарымбетов алғашқылардың бірі болып Францияның кино өнері академиясының лауреаты атанды, Жорж және Рита Садуль атындағы беделді сыйлықты иеленді. Жұлдызды ашқан «Қазақфильм» киностудиясының президенті Ақан Сатаев Нарымбетовтің ұлдарына жақында Францияда өткен Қазақстан киносының фестивалі аясында режиссерге марқұм болғаннан кейін берілген «Ұлттық кинематографияның дамуына қосқан үлесі үшін» сыйлығын табыс етті.
Оператор және режиссер, сценарист Игорь Вовнянко, актерлер – Меңтай Өтепбергенов, Жамбыл Құдайбергенов және Фархат Әбдірайымов, оператор-режиссер Вячеслав Белялов, бас инженер-сәулетші Юрий Бреус, кинооператор және режиссер, Отан соғысының ардагері Марк Беркович, сондай-ақ кеңестік Қазақстанның алғашқы хроникасын түсірген алғашқы кинооператорлардың бірі Ескендір Тынышпаев сынды еңбегі сіңген қайраткерлердің есімі Жұлдыздар аллеясынан өз орнын еншіледі.
Естеріңізге сала кетсек, Жұлдыздар аллеясы 2011 жылы YII Халықаралық «Еуразия» кинофестивалі аясында ашылған болатын. Бүгінде бұл аллеяда барлығы 46 киногердің есімі бар жұлдыздар орнатылған.
АЛМАТЫ
