– Үнемі жымиып жүретін жылы жүзді Мейірханның табанды, қайсар мінезі әскери адамға тән еді. «Апай, мен мектеп бітірген соң қалайда әскери қызметкер болуды қалаймын» дейтін еді. Табанды бозбала сөзінде тұрып аттестатын қолына алған соң оқу грантымен өзі қалаған оқу орнына оқуға түсті, –дейді №11 мамандандырылған физика-математика гимназиясының директоры З.Қоразова.
Мейірханның 7-сыныпта танысқан досы Азамат Сұлтановтың айтуынша, екеуі мектеп қабырғасында жүргенде Алматыдағы Ұлттық қауіпсіздік комитеті Шекара академиясында оқуды жоспарлайды. Мектепті Азаматтан бір жыл бұрын бітірген Мейірхан сөзінде тұрып, 2020 жылы аталған академияның курсанты атанады, ал Азамат бір жылдан соң барып курсанттар қатарын толықтырады.
Алматыда аяқ астынан дүрбелең басталған сәтте арнайы бұйрықпен қолына қаруын алып Отан қорғауға ұмтылған жас сарбаз ерлікпен қаза тапты. «Тәуелсіз еліме еңбек етемін!» дейтін елін сүйген патриот Мейірхан Ержанұлы офицер болып еліне қызмет етіп шекара шебінде жүруге үлгерген жоқ, бірақ небәрі 19 жасында елді, жерді сүюдің, Отанды қорғаудың қандай болатынын өз ерлігімен дәлелдеп кетті. Ол қаза тапқан соң, марқұм болған өз қаруластарымен бірге 2022 жылы 9 қаңтарда Мемлекет басшысы Қ.Тоқаевтың Жарлығымен әскери және қызметтік борышын атқару үстінде көрсеткен батылдығы мен жанқиярлығы, сондай-ақ мемлекет мүддесін қорғау кезінде жасаған ерлігі үшін
III дәрежелі «Айбын» орденімен марапатталды.
Ақтау қаласына жеткізілген Мейірханның денесін Маңғыстау облысының әкімі Н.Ноғаев бастаған ел азаматтары, марқұмның әкесі Ержан, туыстары мен достары қарсы алды. Марқұмды туған шаңырағына бір түнетіп, 10 қаңтар күні жаназа намазы оқылды. «Достық» үйінің ауласына Мейірханды шығарып салуға жиналған адам өте көп болды.
– Мейірхан баламыз нағыз ерлерше көз жұмды. Азамат үшін ең басты міндет – Отанды қорғау! Мемлекетімізді қорғау жолында жанын құрбан еткен Мейірхан Ержанұлының ерлігі көпке үлгі, есімі ел есінде. Еліміз аман болсын, ендігі жерде халықтың басына қиындық түспесін, жастардың басына жамандық жолықпасын. Мен Бітім аға бастаған Кезбаевтар әулетіне қайғыра көңіл айта тұрып, батыр ұл тәрбиелеген отбасыға алғыс айтамын, – деді аймақ басшысы.
Мейірхан туып-өскен әулет Маңғыстау өңіріне белгілі, сыйлы, текті әулет. Тек жағынан 27 жасында ел-жер қорғау үшін қан майданда шейіт болған Адайдағы белгілі Есенияз батырдың тұқымы болып келетін Мейірханның атасы Бітім ақсақал – мұнай өндірісі саласында сервистік қызмет көрсетіп, мыңнан астам адамды жұмыспен қамтып, ел экономикасының дамуына зор үлес қосып келе жатқан «КезБи» ЖШС құрылтайшысы. Ал Мейірхан – отбасының тұңғышы, әкесі Ержан – жеке кәсіпкер.
Өзі «алтын балам» деп атайтын немересінің жаназасында Бітім ағай, туысы Тәжмағанбет ақсақал, ұстаздары мен достары сөз алып, кеше ғана арада жүрген сүйкімді жас жігітке қимастықпен қинала тұрып қоштасу сөз арнады.
Маңғыстау облысы бойынша Шекара қызметі департаментінің бастығы Әлібек Коюпов сөз алып, «Мейірхан әріптесіміз енді ана әлемнен шекара шебін қорғауға кетті. Ерлікпен қаза тапқан марқұмның топырағы торқа болсын!» деп көңіл білдірсе, жауынгерлер үш мәрте оқ атты.
Әскери оркестр Қазақстан Республикасының мемлекеттік Әнұранын орындаған сәтте көк Туды жамылып жатқан жас батырдың құлағында қалатын соңғы саз, жердің үсті – жарық дүниеден еститін соңғы әні өзі сүйген, өзі жанын құрбан еткен туған елінің Әнұраны болды.
Қош бол, ерен ерліктің үлгісі – жас батыр!
Маңғыстау облысы
