Алматыда жүргізілген тексеру жұмыстарының қорытындысы қаланың жол-көлік инфрақұрылымы қаншалықты зардап шеккенін көрсетті. Бейбіт ереуілшілер тоғысқан «Алматы Арена» аумағында және Назарбаев пен Достық даңғылдары, Сәтбаев көшесінің бойында, Республика алаңында тас төсеніштері бұзылған 2 мыңнан астам орын анықталды.
Дүйсенбіден бастап көшелерді жөндеуге 80 жұмысшы, 30 арнайы техника шығарылды. Сондай-ақ 120-дан астам жол белгілері зақымдалғаны анықталды. Бүгінде олардың 80-і қалпына келтірілді. Сонымен қатар қалада бағдаршам нысандарын қалпына келтіру жұмыстары басталды. Бұған дейін хабарланғандай, қалада 40-тан астам бағдаршам зақымдалған. Олардың 15-і 9 қаңтарда қалпына келтірілсе, 10 қаңтарда 7 бағдаршам нысанына күрделі жөндеу жүргізу жоспарланды. Қаланың көше-жол желісін қалпына келтіру және тексеру жұмыстары жалғасып жатыр.
АЛМАТЫ
