«АҚШ Қазақстан Үкіметіне 12 қаңтарда АҚШ консулдығының кейбір қызметкерлерін, АҚШ азаматтарын және басқа да шетел азаматтарын Алматыдан уақытша эвакуациялауды қолдағаны үшін алғыс білдіреді. Қазақстан әрқашан Америка Құрама Штаттарының сенімді досы болған. Біз қазақстандықтардың табандылығына және олардың осы дағдарыстан қалпына келу қабілетіне сенеміз», делінген АҚШ дипломатиялық миссиясының баспасөзге арналған ресми мәлімдемесінде.
Бұған дейін, 6 қаңтарда АҚШ Мемлекеттік хатшысы Энтони Блинкен мен Қазақстанның Сыртқы істер министрі Мұхтар Тілеуберді телефон арқылы сөйлесті, оның барысында АҚШ тарапы Қазақстанның конституциялық институттарына толық қолдау білдірді.
«Біздің барлық қызметкерлеріміз жағдай мүмкіндік берген кезде Алматыға оралады деп үміттенеміз», деп толықтырды баспасөз қызметі.
