Жасыл құрлықтағы додада отандасымыз бразилиялық Беатрис Хаддад Майямен бірге жарыстың үшінші ракеткаларын жеңіп, турнирдің сенсациясын тіркеді. Қазақстандық-бразилиялық жұп 1 сағат 5 минутқа созылған бәсекеде канадалық Габриэла Дабровски мен мексикалық Джулиана Олмосты 6:4, 6:2 есебімен ұтты. Анна мен Беатрис жартылай финалға шығу үшін ресейліктер Екатерина Александрова және Натела Дзаламидземен шеберлік байқасады.
Ерлер арасындағы осы жарыста Андрей Голубев пен хорватиялық Франко Скугор корт иелері, аустралиялықтар Мэтт Рид – Алексей Попыринге 3:6, 1:6 есебімен есе жіберді. Тағы бір қазақстандық Александр Недовесов пәкістандық Айсам Курешимен бірге кеше жартылай финалға шығу үшін аустралиялық Джон Пирс – словакиялық Филип Полашекпен сынға түсті.
Өкінішке қарай, жекелей бәсекеде тәуір өнер көрсетіп келе жатқан еліміздің бірінші, әлемнің 13-ракеткасы Елена Рыбакина жарақатына байланысты жарысты жалғастырудан бас тартты. Ол екінші айналымда франциялық Каролин Гарсиямен кездесуге тиіс болатын.
