Жақында елімізде жетекші шетелдік жоғары оқу орындарының филиалдары ашыла бастаған болатын. Енді Ресейдің үздік техникалық жоғары оқу орындарының филиалдарын ашу жоспарланып отыр. Бұл бізге не үшін керек? Жаңа экономика құру үшін университеттердің бәсекеге қабілеттілігін арттыру маңызды. Ал Президент 2025 жылға қарай елімізде беделді шетелдік жоғары оқу орындарының кем дегенде 5 филиалын, оның екеуін техникалық бағытта Қазақстанның батыс өңірінде ашуды тапсырды. Неге? Батыс облыстарға шетелдік инвесторлар жаңа технологияларды әкеліп жатыр. Онымен біздің жастар жұмыс істей алмай жатады. Тіпті кейбір техникалардың тілін білетін мамандар тапшылығы байқалады. Отандық оқу орындарының ондай құрал-жабдықтары жоқ. Соған байланысты шетелдік базасы мықты қалыптасқан университет Қазақстанда филиалын ашса, жастарға жаңа мүмкіндік туады.
Негізінен филиалын ашатын университеттің беделіне қараған дұрыс. Дегенмен ондағы мамандықтарға да мән берген жөн. Себебі шетелден немесе халықаралық университеттен сұраныста жоқ мамандықты оқып алып, жұмыссыз жүрген жастар жетерлік. Сондықтан алдымен сол филиал ашатын өңірге қажетті, қазір тапшы болып тұрған мамандықтарды зерделеу қажет. Содан соң барып сол мамандықтарға қандай шетелдік университет даярлайтынын білу керек. Мұнымен енді университеттер жіті айналысқаны абзал.
Рахман АЛШАНОВ,
Жоғары оқу орындары
қауымдастығының төрағасы
