Футбол • 20 Қаңтар, 2022

Үшінші чемпионаттан үмітіміз көп

32 рет көрсетілді

Кеше Нидерландтың бас шаһары – Амстердам мен осы елдің солтүстігінде орналасқан аса ірі қаланың бірі – Гронингенде футзалдан 2022 жылғы Еуропа чемпионатының жалауы желбіреді. Бұл – Нидерланд корольдігі қабылдап жатқан алғашқы Қарт құрлық додасы. Бұған дейін «қызғалдақтар елінің» 1989 жылғы әлем чемпионатын дүркіретіп ұйымдастырғаны көпшіліктің есінде болса керек. Бұдан бөлек, Нидерланд клубтар мен құрамалар арасындағы бірнеше маңызды жарыстарды да ұйымдастырғанын жанкүйер қауым жақсы біледі.

Чемпионаттағы өзгерістер

1996 жылы тұсауы кесілген футзалдан Еуропа чемпионаты 2018 жылға дейін әр екі жыл сайын ұйымдастырылып келген болса, енді биылдан бастап үл­кен футбол додалары сияқты әр төрт жыл сайын өткізілетін бо­лып бекітілді. Сондай-ақ осы жылы Қарт құрлық біріншілігіне қаты­сатын құрамалардың саны да артты. Бұған дейінгі чемпионаттарда 12 құрама бақ сынаса, енді олардың саны 16-ға дейін көбейді.

Еуропа біріншілігіне 2016 жылдан бастап қатысқан бастаған Қазақстан құрамасы биыл қа­тарынан үшінші мәрте өнер көр­сетпек. Сербия астанасы – Бел­градтағы құрлық додасында жер­лестеріміз С тобында Ресей­ден кейінгі екінші орынға табан ті­реп, жартылай финалға дейін алқынбай жетті. Финалға жолдама беретін шешуші матчта азулы Испания футзалшыларынан 5:3 есебімен жеңіліп, үшінші орынға таласуға мүмкіндік ал­ды. Қола жүлде үшін болған ойында жарыс қожайындары Сер­бияны 5:2 есебімен тас-тал­қанын шығарып, Еуропа чем­пио­натының қола жүлдесін жеңіп алды. Жерлестеріміздің алғашқы Еуросы осындай үлкен жеңіспен аяқталған еді.

Араға екі жыл салып Қазақстан футзал құрамасының жолы Сло­венияда ұйымдастырылған Еуропа чемпионатына түсті. Бұл жолы да отандастарымыз тәуір нәтиже көрсетті деп айтуға болады. Кака бастаған жігіттер қола жүлдеге сынық сүйем қал­ғанда сүрінді. Топтық кезеңде бір жеңіс (Польша – 5:1) және бір тең (Ресей – 1:1) нәтижеге қол жеткізіп, бірінші орынмен келе­сі кезеңге өтті. Ширек финалда Сербияны 3:1 есебімен ұтқа­нымен, өкінішке қарай, жартылай финалда тағы сол Испа­нияға пенальтиде жол берді – 5:5 (5:3). Қола үшін болған ойында ресейліктердің бағы жанды – 1:0. Сөйтіп, екінші Еуропа чемпионатында төртінші орынға табан тіредік.

Енді, міне, үшінші Еуропа чемпионатында да жүлделі орындардан көрінуді көздейтін Қазақ­стан футзал құ­рамасы дүй­­сен­бі күні Нидер­ланд елін бет­ке алды. Нұр-Сұл­тан – Ыстанбұл – Амс­тердам ба­ғытында ұшып, EURO-2022 додасы өтетін елге табан тіреді.

Бразилиялық бестік

Ұлттық құраманың Ни­дерландқа сапары алдында «Қайрат» футзал клубының баспасөз қызметі команданың бразилиялық шабуылшысы Эдсонның Қазақстан аза­мат­тығын алғанын хабарлады. Демек, ол бүгін Словениямен болатын ойында ел намысын қорғауы әбден мүмкін. Эдсон – Қазақстан азаматтығын алған бесінші бразилиялық футзалшы. Игита, Дуглас және Лео Қазақстан ұлттық құрамасында сегіз жылдан бері доп теуіп ке­леді. Ал Тайнан Эдсон сияқ­ты 2018 жылғы Еуропа чемпио­натының алдында ғана ұлттық құрама жейдесін киген еді.

Эдсонның Қазақстан азамат­тығын алғаны интернет басылымдарында хабарланғаннан кейін жанкүйерлердің пікірі екіге бөлінді. Ал футзалдан Қазақ­стан ұлттық құрамасының бұрынғы бас жаттықтырушысы Әміржан Мұқанов Эдсонның ұлттық құрамаға алынуын дұрыс шешім деп есептейді.

– Ұлттық құраманың ішінде жергілікті ойыншылар мен легионерлер арасында тепе-теңдік сақталуы керек. Кака әзірше бұл істі мінсіз атқарып келеді. Дуг­лас, Лео, Игита секілді жігіттер ұлттық құрамада 2013 жылдан бері ойнап келеді. Ал Эдсонның оларға қарағанда әлдеқайда жас еке­нін ескерсек, бұл бас бапкер­дің алдағы чемпионаттарға жасаған қадамы болуы мүмкін. Жігіт­тері­міз былтыр әлем чемпионатында қалай ойнағанын, жүлдеге бір қадам жетпей қалғанын бәрі жақсы біледі. Сондықтан Кака сол олқылықтың орнын толтырып, осы құраммен бірге биыл Еуропа чемпионатында топ жаруды көздеп отыр. Эдсон өз кезегінде ұлттық құрамаға көмегін тигізеді деп ойлаймын, – деді ол.

Сондай-ақ футзалдан Қазақ­стан құрамасының капитаны, әлемнің бес дүркін үздік қақпашысы Игита да бесінші легионер туралы өз ойын ортаға салды.

– Біріншіден, бұл автоматты процесс екенін айтқым келеді. Өйткені осы чемпионаттан кейін Қазақстан құрамасында буын алмасып, жаңа циклға да­йындық басталады. Мен, Лео және Дуглас келесі әлем, Еуропа чемпионаттарында ойнаймыз ба, жоқ па оны білмеймін. Себебі біз жас емеспіз. Әлі де 3-4 жыл доп тебуге күшіміз жететін шығар, бірақ уақыт озған сайын жас­тармен иық тірестіре ойнау бізге қиындай түседі. Сондықтан болашақ туралы ойлану керек. Азаматтықты кез келген ойыншы ала алмайды. Ол өзінің мықты әрі сол орынға лайықты екенін дәлелдеуі керек. Ал Эдсонды Қазақстан жанкүйерлеріне өзін дәлелдеп үлгерген ойыншы деп есептеймін. Ол осы чемпио­натта біз­ге зор кө­­ме­гін тигізе­ті­ніне се­нім­дімін, – деді Игита.

Кейін­гі 6-7 жылды алып қара­са­ңыз, Қазақ­­­стан футзалы қай дең­гейге дейін жоға­ры­лағанын байқайсыз. Легио­нерлер болса алаңда Қазақстан құрамасы үшін бар ынта-жігерімен, шын жүрегімен ойнап жүр.

Топтағы қарсыластар

Қарт құрлықтың бірін­шілігінде Қазақстан құра­масы В тобында өнер көрсететін болады. Онда Еуропаның екі дүркін чемпионы Италия, Словения және Финляндия құрамалары бар. Топтағы бірін­ші орынға Қазақстан құ­ра­масы дәл осы Италия коман­дасымен бірге таласатын секілді. Біздің топ­тық матчтар Гронинген қала­сында ойналады. Топтық кезең­нің матчтары 20-28 қаң­тар күндері өтеді. Ширек фи­налға әр топтан бірінші және екінші орын алған командалар ғана шығады.

Жеребеден кейін бас бапкер Кака қарсыластардың мүм­кіндігін былай бағамдаған еді: «Еуро-2022 турниріндегі барлық топ мықты деп ойлаймын. Мұндай турнирде жеңіл топтар болмайды. Бірінші матч­ты Словениямен өткіземіз. Олармен әлем чемпионатының іріктеу кезеңінде ойнадық. Бұл техникалық жағынан мықты және қуатты команда. Сонымен қатар Дуглас бұл кездесуге қа­тыса алмайды, өйткені ол өткен Еуропа чемпионатының соңғы матчында қызыл қағаз алып, алаңнан қуылған болатын. Фин­ляндия құрамасы физикалық тұрғыдан мықты команда саналады. Италия құрамасында буын алмасу процесі жүріп жатыр. Егер бұрын Италияда онға жуық бразилиялықтар ойнаған болса, қазір олардың құрамында италиялықтар көп».

EURO-2022 додасы кеше Нидерланд – Португалия матчымен басталды. Ал бүгін Қазақ­стан Словениямен күш сынасып, додадағы алғашқы матчын өткізеді. Араға 4 күн салып, яғни 24 қаңтарда Финляндиямен кезде­седі. 28 қаңтарда Рикардо Кака шәкірттері италиялықтармен ойнайды. Осы матч көп сауалдың түйінін тарқатады.

Матчтар 2012 жылдан бас­тап пайдалануға берілген Ziggo Dome және 1989 жылы құрылған MartiniPlaza спорт кешендерінде өтеді. Ziggo Dome аренаға 11 мыңға жуық, MartiniPlaza-ға 4 мыңнан аса жанкүйер сыяды.

Еуроға қатысатын Қа­зақ­стан құрамасының мүше­лері:

Қақпашылар: Игита, Рауан Атантаев.

Алаңдағы ойыншылар: Тайнан, Нұрбек Қарағұлов, Эдсон, Лео, Азат Валиуллин, Альберт Ақбалықов, Шыңғыс Есенаманов, Арнольд Кнауб, Дәурен Тұрсағұлов, Жомарт Тоқаев, Дуглас және Біржан Оразов.

Соңғы жаңалықтар

Есіңде болар әр күнің

Қазақстан • Кеше

Жемқорлық статистикасы

Қазақстан • Кеше

«Бір белгі үшін...»

Кино • Кеше

Шынайылық

Өнер • Кеше

Ұқсас жаңалықтар