Президент • 21 Қаңтар, 2022

Елде табыс тауып, оны шетелде жұмсаймыз қағидаты тоқтайды – Президент

1459 рет
көрсетілді
2 мин
оқу үшін

Мемлекет басшысы инвестициялық саясатты ретке келтірудің маңызы зор екеніне тоқталды. Сондай-ақ ол білім саласындағы жұмыстарды ширату керектігін атап өтті, деп хабарлайды Egemen.kz.

Елде табыс тауып, оны шетелде жұмсаймыз қағидаты тоқтайды – Президент

«Үкімет инвестициялық міндеттеменің орындалуына зерделеу жүргізуі шарт. Дәл қазір шетелдік инвестициялар үшін күрес шиеленіскен кезде біз ішкі резервтерге барынша көбірек арқа сүйегеніміз абзал. Мұнда әрине, отандық компаниялардың қаражаты туралы айтылып отыр. Егер сіздер өз болашақтарыңызды Қазақстанмен байланыстырсаңыздар, онда қаражаттарыңызды біздің елге қайта инвестициялау керек. Сіздердің Қазақстан алдындағы әлеуметтік және саяси жауапкершіліктеріңіз осы. Іс жүзінде «Елде табыс табамыз – оны шетелде жұмсаймыз» деген қағидаттың болуына бұдан былай еш құқық жоқ», деді Қасым-Жомарт Тоқаев.

Президент негізгі жұмыс екі бағыт бойынша іске асатынын тіліне тиек етті. «Жұмыс екі бағыт бойынша жүргізілетін болады. Елге капиталды қайтару мен капиталды қайтаруды ынталандыру, сондай-ақ офшорға қаржы шығаруға тосқауыл қою», деді Қасым - Жомарт Тоқаев.

Сондай-ақ Президент мемлекеттік-жекеменшік серіктестікті қайта ретке келтірудің маңыздылығын атап өтті.

«Елге инвестиция тартудың тағы бір бағыты мемлекеттік-жекешелік серіктестікті қайта ретке келтіру болуы тиіс. Бүгінде бұл құрал шын мәнінде мемлекеттік сатып алулар процедурасын айналып өтудің құралына айналған. Бюджетке барлық кәсіпкерлік тәуекел аударылады. Жоғары жеңілдіктер мен жоғары шектеулер негізсіз ұсынылады», деп атап өтті Мемлекет басшысы.Сонымен қатар ол «Үкіметке мемлекеттік-жекешелік серіктестіктің жаңа заманауи тәсілдерін құру қажет», деді. Қысқасы Қасым - Жомарт Тоқаев бұл бағыттағы жұмыс жаңаша процеспен жүруі керектігін қадап айтты.

«Білім саласы туралы айтар болсақ, айналып келгенде әңгіме оның сапасына келіп тіреледі. Нарық нақты бір сала мамандарын талап етсе, ал біздің білім министрлігінің нормативтік талабы басқа. Егер қазіргі нарық сұранысы белгілі бір сала маманын талап етсе, соған сай сіздер де өзгеріп отыруларыңыз керек», деді Қасым - Жомарт Тоқаев ірі бизнес өкілдерімен кездесуінде.

Президент білім беру мен маман даярлау уақыт талабымен үндесуі қажеттігін ескертті. «Қайталап айтамын, біз стандартты білім беру форматын қайта қарауымыз керек. Сонымен қоса өскелең ұрпақтың да менталитетін өзгерткен жөн. Бұл мәселе елде болған қайғылы жағдайдан сабақ алатын жайттардың бірі», деді ол.