Экономика • 24 Қаңтар, 2022

Қиратылған банкоматтар – үш банктің меншігі

318 рет
көрсетілді
2 мин
оқу үшін

Қаңтарда болған бүлік кесірінен елдегі 12 мың банкоматқа 2 млрд теңге көлемінде шығын келген. Алматыда қирап қалған мың банкоматтың барлығы үш банкке – Halyk Bank (389 дана), Kaspi Bank (381) және ForteBank-ке (194) тиесілі екен.  

 

Қиратылған банкоматтар –  үш банктің меншігі

Инфографиканы жасаған Амангелді ҚИЯС, «ЕQ»

Ұлттық банк дерегінше, 2021 жылдың қыркүйек айындағы жағдай бойынша Қазақстанда 12,5 мың банкомат бар. Бір жылда құрылғылар саны бесеу­ге азайған. Ал соңғы бес жылда 2,8 мың данаға немесе 29,3 пайыз­ға көбейген. Бұл ретте, бес жыл бұрын Cash-In функциясы бар банкоматтар үлесі небәрі 16,4 пайызды құраса, 2021 жылдың қыркүйегінде 45,5 пайызға (5,7 мың) жеткен.

Finprom-ның жазуынша, банкоматтардың басым бөлігі Алматы қаласында (2,4 мың) орналасса, 1 мың банкомат елордада, тағы 1 мыңы Қарағанды облысында және Түркістан облысы мен Шымкентте де осыншама қаражат құрылғысы бар екен. 2022 жылдың 18 қаңтарындағы екінші деңгейлі банктердің сайтындағы ресми ақпарға сүйенсек, елдегі банкоматтар жүйесінде 10,1 мың дана банкомат бар. Банкоматтар көптігі бойынша Halyk Bank (3,7 мың) көш бастаса, одан кейінгі орындарда Kaspi bank (2 мың) пен Jusan (979) тұр.

«Атамекен» ұлттық кәсіп­керлер палатасының дерегі бо­йынша, ел аумағында 1 823 биз­нес субъектісі зардап шексе, соның 1 573-і Алматыда ор­на­лас­қан. Жаппай ереуіл кезін­де қар­жы секторындағы 86 субъекті де бүлінген. Қаржы нары­ғын реттеу және дамыту агент­ті­гі алдын ала есептелген шы­ғын көлемі 4,1 млрд теңге екенін ай­­тады. Соның 1,6 млрд теңгесі – банкоматтар­дың бүлінуі және одан қар­жы ұрлануынан болған шы­ғын. Залал келген банкомат­тар­дан бұзақылар 507 млн тең­гені ұрлап кетіпті. Жиынтық шы­ғын сомасының 99 пайызы Алматыға тиесілі.