Қазір РВ-90 И.Жекенова атындағы Жұқпалы аурулар ауруханасының филиалында індетке шалдыққан 199 пациент бар, оның 21-і жансақтау бөлімшесінде. Орталық қалалық клиникалық ауруханасы базасында ашылған телемедицина орталығы мамандарының бақылауында 10 188 пациент бар. Бұл көрсеткіш биылғы 1-20 қаңтар аралығында 20 есе өсті. Орташа алғанда, пациенттерге шамамен 5 мың қоңырау шалынады. 20 қаңтарда 8 458 қоңырау соғылды, оның барысында науқастың жағдайы сұралып, КВИ емдеу бойынша ұсынымдар беріледі. Ал №7 аурухана базасында орналасқан КВИ-ға қарсы вакциналардың қалалық қоймасында және егу пункттеріндегі I және II компонентті вакциналардың қалдығы Синофарм вакцинасының 207 733, QazVac вакцинасының 176 349, Pfizer 254 782 дозасын құрайды.
Қала әкімі Б.Сағынтаевтың қатысуымен өткен КВИ таралуына қарсы іс-қимыл жөніндегі штаб отырысында ковидтік стационарлардың бас дәрігерлері пациенттерді қабылдау және емдеу барысы туралы баяндады. Балалар мен жүкті әйелдерді емдеуге ерекше көңіл бөлініп отыр. Мәселен, 1-20 қаңтар аралығында қалалық балалар жұқпалы аурулар ауруханасына КВИ жұқтырған 346 бала түссе, инфекциялық бөлімшелерде 102 жүкті әйел бар.
Өткен аптада Алматы қалалық қоғамдық денсаулық басқармасының қоймасына Спутник Лайт вакцинасының 12 000 дозасы жеткізілді. Бұл вакцина ревакциналауға арналған.
АЛМАТЫ
