Аймақтар • 26 Қаңтар, 2022

Алматыға алты реанимобиль алып берді

Алматыдағы оқиға салдарынан 32 жедел медициналық жәрдем көлігі зардап шекті. Жуырда «Astana Motors» ЖШС Жедел медициналық жәрдем қызметіне жаңа 6 реанимобиль әперді.

Айнаш ЕСАЛЫ

«Қаңтардағы қайғылы оқиғаларда қаза тапқандардың отбасылары мен жақындарына қайғыра көңіл айтамыз. Қазақтың «Ырыс алды – ынтымақ» деген мақалы бар. Бүгінгі таңда әрқайсысымыздың қоса алатын ең құнды үлесіміз – бір-бірімізге деген құрметімізді сақтап, болашақ ұрпақ үшін еңбек ету», деді Нұрлан Смағұлов атындағы қордың директоры Айдын Сұлтанов.

«Алматыда қаңтар айының басындағы қайғылы оқиға кезінде медициналық ұйымның 32 жедел жәрдем көлігі, тағы бір медициналық мекеменің көлігі бүлінді. Сондықтан жаңадан беріліп отырған реанимобильдер, әсіресе коронавирус инфекциясының өсуі мен жедел жәрдем қызметіне жүгінулер көбейіп жатқан заманда өте үлкен көмек болды», деді Алматы қаласы Жедел жәрдем қызметінің директоры Ербол Сәрсенбаев.

Hyundai H350 Ambulance жедел жәрдем көлігінде тәжірибесі бар дәрігерлер автомобильдің сенімділігін, қауіпсіздігін, функционалдығы мен қызмет көрсетудің қарапайымдылығын атап өтті. Жедел жәрдем көлігінің артықшылығы, жайлылық пен жұмсақтығы, бұл дәрігерлерге ауруханаға барар жолда жансақтау іс-шараларын толық жүргізуге мүмкіндік береді. Жедел жәрдем көлігі Кеден одағының техникалық регламенттеріне, Денсаулық сақтау министрлігінің жолаушыларды тасымалдауға арналған көлік құралдарына қойылатын талаптарына сәйкес келеді және Еуро-5 экологиялық стандарттарының үдесінен шығады.

Жаңа реанимобильдер алғашқы медициналық көмек көрсету үшін өкпені жасанды желдету аппараттарымен, өкпені жасанды желдету құрылғылары, оттегімен ингаляциялауға арналған жүйе жиынтығымен, дефибриллятор-мониторларымен, электрсорғыштармен, артериялық қысымды, пульсоксиметрияны, температураны өлшеу функциялары бар реанимациялық-анестезиологиялық мониторлармен және басқа да заманауи технологиялармен жабдықталғанын айта кету керек.

Реанимобильдің соңғы шыққан моделінде төбесі жоғары орналасқан. Бұл дәрігерге науқасқа тік тұрып көмектесуге мүмкіндік береді. Сонымен қатар заманауи жедел жәрдем көлігі жоғары жылдамдықта теңселмеуіне мүмкіндік береді.