Өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шайымбетов ауруды анықтау мен алдын-алу бағытындағы жұмыстарды саралап өтті.
– Қазір облыс «қызыл аймақтар» қатарында тұр. Індет жұқтырушылар қатары да күн сайын артып барады. Дертті дендетпеудің жалғыз амалы – екпе алу. Осы күні облыста вакцинаның 1 компонентін алғандар 92,6 пайыз болса, екінші бөлігін салдырғандар да осы межеге жетіп қалды. Ал ревакциналаудан 39 537 тұрғын өткен. Сондай-ақ 8 мың доза «Спутник-Лайт» вакцинасы жеткізіліп, барлық емханаға жөнелтілуде, – деді Ж.Шайымбетов.
Індетке шалдығушылар облыс орталығында көп тіркеліп отыр. Аудандар арасында Шиелі және Жаңақорғанда вирус жұқтырғандар басым. Облыстық санитарлық-эпидемиологиялық бақылау департаменті басшысының міндетін атқарушы Әлия Әбдіқайымова 20-39 жас аралығындағылар індетке жиірек ілігіп отырғанын айтып өтті.
– Сондай-ақ 14 жасқа дейінгі балалар арасында да көбірек байқалып отыр. Облыста коронавирус инфекциясынан бөлек, жіті респираторлық вирусты инфекциялардың эпидахуалы күрделеніп тұрғанын да айта кетейік. Соңғы аптадағы көрсеткіштер өткен кезеңдермен салыстырғанда 1,5 есеге артқан, – деді Әлия Мүтәліпқызы.
Қызылорда облысы
