Енді біздің алдымызда Президент айтқандай, жаңа Қазақстанды құру міндеті тұр. Осынау іргелі міндетті еңсеру үшін бірінші кезекте Президенттің маңына топтасып, оның күн тәртібіне шығарған бастамаларына қолдау білдіргеніміз абзал.
Бүгінде түрлі ақпарат көздері, әлеуметтік желілер арқылы кейбір азаматтар Үкіметті түгелдей таратып жіберуге үндеп жүр. Егер солай жасалса, оның соңы елді тығырыққа апарып тіремей ме? Иә, кеше ғана қайта жасақталған Үкіметті алақайлап мақтап ала жөнелуден аулақпын. Дегенмен осы Үкіметке мүмкіндік берген орынды. Өйткені Үкімет құрамына енгісі келіп өзеуреген топтың ішінде білікті мамандар мен тәжірибелі қызметкерлердің бар екеніне менің күмәнім бар. Осындайда француз жазушысы Проспер Мерименің атақты «Таманго» новелласы еріксіз еске түседі. Онда шексіз де түпсіз теңізде жүзіп келе жатқан кемедегі құлдарды кеме капитаны сенім артқан көмекшісі Таманго есімді қара нәсілді үгіттеп бүлік жасатады. Бүлікшілер капитан мен экипаж мүшелерін түгел өлтіріп тастайды. Енді әрі қарай кемені жүргізетін ешкім болмай қалады. Оларды үгіттеп бүлікке бастаған Тамангоның өзі, тіпті компастың тілін білмейтін болып шығады. Осылайша, құлдықтан құтылдық деген топ теңізге батып өлу қаупіне тап болады. Айтайын дегенім, ел арасына ши жүгірткіш кейбір саясаткерлер «Өзі көтере алмайтын шоқпарды беліне байламаса екен».
Президент Қ.Тоқаевтың жаңа Қазақстанның ендігі дамуына бәріміз атсалысайық. «Бір жағадан бас, бір жеңнен қол шығарайық!» деген халқымыздың ежелгі даналығын дәл бүгінгі таңда әр қазақ, әр қазақстандық есінде ұстауы керек. Әр таңға шүкірлік етіп, ынтымағымызды сақтап, тәуелсіздігімізді қастерлей білгеніміз – жақсы күндермен қауышуымыздың кепілі болса керек!
Шаяхмет Алжанбай,
ақын