Шеруге бастапқыда «Бостандық колоннасы» деп аталатын жүк көліктерінің жүргізушілері шыққан еді. Олар вакцина егу талабына наразылық білдірді. Бірақ митингтің жалғасы пандемия кезінде үкіметтің шектеу шараларын көбейтуіне қарсылық ретінде өрбіді.
Митинг сенбі күні таң атпай ерте басталып, түске дейін жалғасты. Тұрғындар Оттаваның шығыс пен батыс жағалауларын және олардың арасындағы жерлерге көліктерін қаңтарған жүргізушілерге түскі ас берді.
Митинг кезінде бетперде кигендер аз болды. Бірақ көбі қалың киінді, өйткені ауа температурасы - 21 градусты көрсетіп тұрған. Жергілікті медианың хабарлауынша, қала орталығындағы сауда орындары шерушілер бетперде киюден бас тартқандықтан есіктерін жауып алған.
Жеке басына қауіп төнгендіктен Д.Трюдо және оның отбасы Оттава қаласының орталығындағы үйінен кеткен. Оның кеңсесі бұған қатысты түсініктеме бермейтінін айтты. Трюдоның алаңдауына себеп бар.
Осы аптаның басында ол жүк көліктері жүргізушілерінің ой-пікірлері жалпы канадалықтардың көзқарасын білдірмейтінін алға тартып, оларды азшылыққа теңеді. Канаданың трансшекаралық жүк көлігін жүргізетіндердің 90 пайызға жуығы және халықтың 77 пайызы екі рет коронавирус вакцинасын салдырған.
Трюдо қазан айындағы сайлау қарсаңында қызметкерлерге вакцина міндеттелетінін жариялады. Содан кейін өткен айда Канада мен Америка Құрама Штаттары трансшекаралық жүк тасымалдаушыларға вакцина салуды тапсырды.
