Өткен аптада Орал қаласында «Ғылым. Білім. Тәжірибе» тақырыбында төртінші интеграциялық конгресс өз жұмысын аяқтады. Мұны тұтас бір кластерлік триада десе де болады. Бірден айтарымыз конгресті ұйымдастырушылар легі мейлінше толыққанды. Оның геоэкономикалық ауқымы мейлінше кең.
Олардың қатарында Қазақстан Республикасының Білім және ғылым министрлігі, Еуразиялық экономикалық қоғамдастық, Ресей тауар өндірушілер одағы, Ресей мен Қазақстанның инженерлік академиялары және Қазақстанның инновациялық және телекоммуникациялық жүйелер университеті (КазИИТУ) бар. Осының өзінен іргелі халықаралық жиын Қазақстан мен Ресейдің шекаралас аймақтарындағы көрнекті ғылым қайраткерлерінің басын қосқанын бірден байқауға болады.
Бұған дейін газетімізде хабарланғанындай, Орал қаласындағы ҚазИИТУ базасында соңғы жылдары дәстүр мен тәжірибеге айналған Еуразиялық өзен аралығы жобасы жаңа технологиялар мен өміршең ғылыми идеялардың генераторына айналып келеді. Бұл бағытта көршілес мемлекеттер арасында сыртқы академиялық ұтқырлық бағдарламасы шеңберінде бірлесіп қолға алынған шаралар шоғыры сан салалы. Әсіресе, Қазақстан Президенті Нұрсұлтан Назарбаевтың биылғы қаңтар айында Қазақстан халқына Жолдауында қойылған мәселелер өте көкейкесті болып отыр. Бұл интеграциялық ғылым мен тәжірибенің басты шикізаты рөлін де атқара алады. Осы орайда, қолданбалы ғылым мен инновацияның негізгі операторына айнала білген Еуразиялық өзен аралығы жобасының орны айрықша.
Айталық, Батыс Қазақстан облысы мен Ресейдің шекаралас губерниялары арасында өзара ынтымақтастық пен тату-тәтті көршілік жөніндегі келісімшарттарға қол қойылған. Бұл игі іс, өзгесін айтпағанда, ғылыми интеграцияның жаңа мүмкіндіктерін ашуға да айтарлықтай септігін тигізді. Ал жоғарыда айтылғандай, Оралда өткізілген төртінші интеграциялық конгресс бұл байланыстың мәні мен маңызын тағы бір биікке көтеріп, оған жаңаша серпін берді десек қателеспейміз.
Иә, кешегі күндері конгресс қызметі шеңбері мен ауқымында ғылым мен энергетика бағытындағы бірқатар интеграциялық жобалар мен үдерістер жан-жақты талқыланды. Соның ішінде шекаралас аймақтар арасындағы инновациялық әлеуеттің мүмкіндіктері және инженерлік ғылым мен ғарыштық технологияларды дамыту жөнінде қос елдің ғалымдары жаңаша әрі тың ой-пікірлер қозғады. Бір сөзбен айтқанда, ғылыми интеграция экономиканың жаңа өміршең салалары мен жүйелерін құруға қызмет жасауға тиіс.
Яғни, көршілес мемлекеттер арасындағы қазіргі басымдық мақсат-мұраттар – ғылым мен білімді түбегейлі түрде жаңғырту, оның өміршең нақты тәжірибемен байланысын тереңдету, ақпараттық әлеуеттің көкжиегін кеңейту, бизнес пен ғылымда көршілес елдердің өзара іс-қимылының үйлесімділігіне қол жеткізу болмақ. Міне, конгресс кезінде оған қатысқан ТМД ғалымдары жасаған тағы бір түйін осындай. Қалай дегенде де «Ғылым. Білім. Тәжірибе» атауын иеленген кластерлік триада тек осындай үздіксіз үрдіс арқылы ғана алға қойған мақсатына жетері анық.
Конгресс жұмысы кезінде тек құрғақ инновациялық идеялар айтылып қоймай, бүгінгі күнгі ғылым мен білім берудегі нақты интеграциялық байланыстар жөнінде көптеген мысалдар келтірілді. М.В.Ломоносов атындағы Мәскеу мемлекеттік университетінің профессоры Сергей Кибальниковтің айтуынша, өткен жылдан бастап Дубна университетінде Қазақстанның инновациялық және телекоммуникациялық жүйелер университетінің жас мамандары қатарынан магистранттар дайындаудың арнайы бағдарламасы қолға алынған. Бұл үрдіс Ресейдің Самара қаласындағы жоғары оқу орындарында да өз жалғасын тауып отыр.
Инновация мен жаңа технологияны трансферттеуге көршілес мемлекеттер ғалымдары осылайша үн қосып келеді.
ОРАЛ.
Суретте: конгрестен көрініс.
