Әлем • 06 Ақпан, 2022

АҚШ: ДАИШ басшысы өлтірілді

410 рет
көрсетілді
4 мин
оқу үшін

Бұған дейін, яғни 3 ақпанға қараған түні АҚШ арнайы күштерінің Сирияның солтүстік-батысындағы Атма қаласында миссиясын сәтті орындағаны хабарланды. Алайда Пентагон сол күні миссияның сәтті аяқталғанынан басқа мәлімдеме жасамады. Кеше АҚШ президенті Джо Байден «Ислам мемлекетінің» (ДАИШ/ИШИМ) жетекшісі, халифі Әбу Ибрахим әл-Хашими әл-Құрайштың өлтірілгенін мәлімдеді.

АҚШ: ДАИШ басшысы өлтірілді

АҚШ басшысы: «Ақпанның 3-іне қараған түні менің бұйрығы­ммен Сирияның солтүстік-батысын­дағы АҚШ Қарулы күштері америка­лық­тар мен одақтастарды қорғау және әлем­де қауіп­сіздікті қамтамасыз ету үшін тер­ро­ризмге қарсы операцияны сәт­ті өт­кізд­і. Біздің Қарулы күш­­тері­міз­дің ше­бер­лігі мен батыл­дығы­ның нәти­же­сінде «Ислам мем­лекетінің» жетек­шісі Әбу Ибра­хим әл-Хашими әл-Құрайш ұрыс алаңында өлтірілді», деп мәлімдеді.

Сонымен қатар АҚШ президенті жауынгерлер операциядан аман-есен оралғанын айтты. Әл-Құрайш нақты қай жерде өлтірілгені туралы дерек әлі хабар­ланбады. ДАИШ-тің ақпараттық ре­сурс­тары көш­басшының қайтыс бол­ғаны тура­лы хабарды әлі растамады, жа­ңа басшы сайлайтыны туралы да қан­дай да бір жаңалық жарияланған жоқ.

Джо Байден бұл хабарды отан­дық телеарналар арқылы халыққа жеткізді. Twitter-дегі парақшасында ол вице-президент Камала Харрис­пен бірге операция барысын бақы­лап отырғаны бейнеленген сурет жариялады.

Ливанның Al Mayadeen теле­ар­­на­сы­ның хабарлауынша, Идлиб про­­в­ин­­циясындағы Атма қа­ла­сы­ның аума­ғында операция кезін­де 13 бейбіт тұр­ғын қаза тап­қан. Опе­рация басталмас бұрын АҚШ ар­найы күштері дауыс күшейт­кіш ар­қылы террористік топ жетек­шісі­не өз еркімен берілуді ұсын­­ған. Көшбасшы келісімнен бас тарт­­қ­аннан кейін ұрыс басталған. Екі тік­ұшақ тарапынан берілген соқ­қы­­дан екі тұрғын үй қирады. Бұл аза­­ма­т­­тардың өліміне алып келді. Reuters агенттігі «Сирия Азаматтық қор­ғанысы» деп аталатын топтың ақпа­ра­тына сілтеме жасай отырып, оқиғада 6 баланың қайтыс болғанын хабарлады. Шабуыл шамамен үш сағатқа созылған.

Бұған дейін қаңтар айының соңында америкалық арнайы күштер Сирия күрдтері құрамаларына Аш–Шаддади ауданындағы Хасаке про­вин­ция­сын­дағы түрмеден қашып кеткен 70-ке жуық ДАИШ со­ды­рының қарулы көтері­лі­сін басу­ға көмектескен-ді. Көтері­ліс күрд­тердің Демократия­лық күштер ода­ғы жауынгерлері мен АҚШ әс­кери күштерінің бірігуімен тоқтатылды.

Әбу Ибрахим әл–Хашими әл-Құрайш 2019 жылғы 26 қазанда топтың бірінші жетекшісі Әбу Бәкір әл-Бағдади америкалықтардың ар­найы операциясы кезінде қаза бол­ған­нан кейін сол жылы 31 қа­зан­­­да «халиф» болып тағайын­дал­ды. Бастапқыда ДАИШ тарапы әл-Бағ­дадидің өлімі туралы ақ­паратты жоққа шығарды. Жаңа бас­шы есіміндегі «әл-Құрайш» оның Мұхаммед пайғамбар (с.ғ.с.) шыққан араб тайпасынан екенін білдіреді. Жалпы, ол туралы нақты ақ­парат жоқ, ДАИШ-тің бейнехабарландыруларында жүзін көрсетіп түспейді. Оның есімі – әл-Хашими де бүркеншік ат деген сыбыс бар. 2019 жылдың қараша айында сол кездегі АҚШ президенті Дональд Трамп Вашингтон әл-Құрайшидің шын есімін анықтағанын хабарлады, дегенмен жетекшінің аты сол күйі аталмады. Әл-Құрайши ДАИШ партизандық соғысқа көшкен кезде топ жетекшісі болып сайланды.

Counter Extremism Project мәлі­мет­тері бойынша, әл-Хашими 1976 жылы Иракта дүниеге келген. Діни білім алған. 2003 жылы «әл-Каида» террористік ұйымына қосылған.

2004 жылы әл-Хашими тұтқын­да­лып, Иракта АҚШ Әкімшілігі бас­қа­ратын Кэмп-Букк лагеріне қа­мал­ған. Онда әл-Бағдадимен таны­сып, оның көзқарастарын бойын­а сіңір­ген деген ақпарат бар. Терро­рис­тік топтағы содырлардың көбі сол ла­герьден қосылғандықтан Кэмп-Букк «ДАИШ-тің отаны» деп аталып жүр.

Әл-Хашимидің түрмеден қалай шыққаны белгісіз. АҚШ оны табуға көмектесетін ақпарат үшін 5 миллион АҚШ долларын ұсынды, содан кейін оны 10 миллион долларға дейін арттырды. 2020 жылы мамырда ДАИШ көшбасшысының қолға түскені туралы ақпарат тарады, алайда Бағдат бұл жаңалықты жоққа шығарды.

Соңғы жаңалықтар