Бұл жүйенің артықшылығы – «Алтыналмас» басшылығы диспетчерлеу қызметінің көмегімен әлемнің кез келген интернеті бар жерінен өндірістегі нақты жағдайды барлық өндірістік жүйелерден жинақталған деректер арқылы көре алады. Ал сапаны бақылау қызметтері кәсіпорын технологтарына кенді қайта өңдеу кезіндегі технологиялық үдерістердегі ақау мен ауытқуларды жедел анықтап, жоюға мүмкіндік береді.
Осылайша, алтын өндіруде алғы шептегі компаниялардың бірі ZIIoT заттар интернеті платформасында өндірісті басқару жүйесін өрістетіп отыр. Платформа мен өндірісті басқару сервистерінің бір бөлігі Қарағанды облысының Ақтоғай ауданындағы «Пустынное» кен орнында енгізілді. Ендігі кезекте өндірістік кестемен қатар энергетикалық теңгерімді оңтайландыру қызметін дамыту қарастырылып жатыр. Бұл жүйе «Долинное» кен орнындағы басқа жобаларға да енгізілмек.
Жобаның бірінші кезеңінде «Пустынное» кенішінде ZIIoT платформасын ERP, SCADA, персоналды басқару, наряд-тапсырмаларды бақылау жүйелерімен, зертханалық, тау-кен-геологиялық, сол сияқты алтын шығару фабрикасы мен бағалы металдар өндіру зауытының басқа да ақпараттық жүйелерімен интеграциялау жүргізіледі. Осылайша, бірыңғай цифрлы қабат құрылады да, қайта өңдеу жөніндегі өндірістік деректер жаңа платформаға жинақталып біріктіріледі. Бұл деректер негізгі пайдаланушыларға жедел режімде қолжетімді болады. Бұдан басқа, платформа негізінде қосымшалар жасау үшін инфрақұрылым жасалып, диагностикалық жүйе енгізілмек.
Кен орнында өндірісті басқару мақсатында диспетчерлеуді автоматтандырып, сапаны бақылау үшін бірқатар қолданбалар енгізілді, зертханалық үдерістер цифрландырылды және металл теңгерімі бойынша блок жасақталды.
Зертхананы автоматтандыру арқылы сынамаларды іріктеу және есептеу кезінде адам факторының әсері қысқартылды. Бұл жалпы алғанда, зертханалық сынақтардың сапасы мен тиімділігін арттырды, сапа туралы деректердің бірыңғай көзі құрылды, деректерді өндірушілерге дереу беру жолға қойылды, ішкі құжат айналымы цифрландырылды және әдістемелер деңгейінде сыртқы зертханамен жіксіз интеграциялау іске асырылды. «Металл теңгерімі» блогы шеңберінде материалдық ағындардың сызбасы мен металды өңдеу үрдістерінің моделі жасалды, материалдық және тауарлық баланстар жинақталды, сапалық-цифрлы ағындарды жинау және мерзімді баланстық көрсеткіштерді есептеу автоматтандырылды, сондай-ақ есептік нысандар цифрландырылды. Бұл есепке алу кезінде шығындар мен қателіктердің пайда болу орнын тез анықтауға, жоспардан тыс шығындардың алдын алуға және материалдық-тауарлық теңгерім арасындағы үйлеспеушілікті азайтуға мүмкіндік береді.
Жобаның келесі кезеңдерінде өндіріс кестесін жасақтау мен оңтайландыру және электр энергиясын толассыз есепке алу қызметін іске асыру, сондай-ақ бірыңғай цифрлы платформаны дамытуды жалғастыру жоспарланған. Бұдан әрі өндірісті басқару үшін енгізілген платформа мен қолданбалы шешімдер «Долинное» нысанында жалғастырылады.
«Алтыналмас АК» АҚ АТ және корпоративтік даму жөніндегі вице-президенті Жанар Аманжолова «Цифрлы кеніш» бағдарламасы туралы: «Бұл жоба біздің кәсіпорынның деңгейінде ғана емес, бүкіл тау-кен металлургия саласы үшін де маңызды. Біз осы бағдарлама арқылы 20 шақты жобаны іске асырып отырмыз. «Цифрлы кеніш» бағдарламасы негізінде жасалып жатқан платформа мен қолданбалы сервистерді енгізу – маңызды жобалардың бірі. Ол барлық негізгі өндірістік үдерістерді қамтиды және кейінгі барлық цифрлы бастамаларды іске асыруға «отын» болатын өндірістік деректерді жинайды», дейді.
«Цифра» басқарушы директоры Павел Растопши қолданбалы цифрлы шешімдерді құру мен қолданыстағы жүйелермен интеграциялау мүмкіндігі бар екенін айтады. Өз кезегінде мұндай цифрлы платформа өндірісті басқаруды айтарлықтай жеңілдетеді, компанияларға бизнес алдында тұрған міндеттерді тез әрі аз еңбек шығынымен шешуге мүмкіндік береді.
ZIIoT платформасына көшу 2019 жылы басталған «Алтыналмас» пен «Цифра» ынтымақтастығының жалғасы екенін айта кеткен абзал. Бұған дейін «Цифра» «Алтыналмас» үшін электронды цифрлы қолтаңбаны пайдалана отырып, ауысымдық тапсырмаларды басқарудың автоматтандырылған жүйесін өрістетуді іске асырған болатын. Осы жүйенің көмегімен кәсіптеріне сәйкес қызметкерлер арасында тапсырма үлестіру мен ауысым алдындағы тексеру негізінде қызметкерлердің жұмысқа кірісуін бақылауға болады.
АЛМАТЫ
