Жергілікті Adal Promotions компаниясының ұйымдастыруымен өткен Ақтаудағы дүбірлі додада жоғарыда атап өткен боксшылардан бөлек, бірқатар жерлесіміз өздерінің рейтингтік кездесулерін өткізді. Бокс кешінің шымылдығын қазақстандық боксшылар Жолдас Жеңісов (2-0, 1 КО) пен Айдос Тастаев (1-2, 1 КО) ашты. 4 раундтың қорытындысы бойынша Ж.Жеңісов ұпай санымен жеңіске жетті. Екінші жекпе-жекте шаршы алаңға көтерілген қазақстандық Мұрат Қыдырәлі (0-1) өзбекстандық дебютант Богдан Өтегеновтен ұпай саны бойынша жеңіліп қалды. Төрт раундқа жоспарланған айқаста төрешілер жеңісті бірауыздан Өтегеновке берді. Үшінші кездесуде екі қазақстандық боксшы Илья Медяник (2-0-1, 0 КО) пен Арман Нұрасылов (2-0, 1 КО) шаршы алаңда қолғап түйістірді. Екінші орта салмақтағы кездесуде төрешілер тең есеп тіркеді – 58-56, 56-58, 57-57.
Сонымен қатар жуырда ғана елорда төрінде Тәуелсіздік күніне орай ұйымдастырылған бокс кешінде өнер көрсетіп, жеңіске жеткен орта салмақтағы Сапарбай Айдаров (7-0, 2 КО) бұл жолы да өз жанкүйерлерін қуантты. Алты раундқа жоспарланған бәсекеде ол ресейлік Давид Николаевтан (9-9-1, 5 КО) төрешілердің шешімімен басым түсті.
Ал араға бірнеше жыл салып рингте бой көрсеткен қазақстандық Бекман Сойлыбаев (14-1, 4 КО) та көрермендерді жарқын жеңісімен қуантты. Мексикалық Элиот Чавеспен (10-4-1, 6 КО) кездескен ол сегізінші раундта қарсыласын нокаутқа түсіріп, бокс кешіне жиналғандарға тамаша көңіл күй сыйлады. Бұл – осы кештегі жалғыз нокаутпен аяқталған кездесу болды.
Рейтингтік кездесулер өз мәресіне жеткен соң, кезек негізгі жекпе-жектерге келді. Әуесқойлар арасындағы әлем чемпионы Бекзат Нұрдәулетов кәсіпқой рингтегі төртінші кездесуін 23 жастағы Нидерланд өкілі Чико Куасимен өткізді. Қарсыласы бүгінге дейін шаршы алаңда алты жекпе-жек өткізіп, соның бесеуінде жеңіске жеткен. Бір кездесуі тең есеппен аяқталған тәжірибелі боксшы еді. 10 раундтық форматта WBO Youth белдігі сарапқа салынған тартысты айқаста Б.Нұрдәулетов техникалық нокаутпен жеңіске жетіп, карьерасындағы алғашқы белдігіне қол жеткізді.
Ал осы кештің басты жекпе-жегінде жерлесіміз Мейірім Нұрсұлтанов (16-0, 8 КО) пен ресейлік Андрей Сироткинмен (19-1-1, 7 КО) орта салмақта бос тұрған WBO International белдігі үшін жұдырықтасты. 36 жастағы ресейлік Андрей Сироткин бұған дейін 21 мәрте шаршы алаңға көтеріліп, 19 рет жеңіске жеткен. Жеті бәсекеде айқын басымдық танытты. Бір рет ұтылып, тағы бір кездесуде тең есеп тіркелді. Осыдан төрт жыл бұрын ол әлемнің экс-чемпионы Рикардо Майорганы ұтқан болатын. 10 раундқа жоспарланған кездесу айқастың бел ортасында мерзімінен бұрын мәресіне жетті. Отандасымыздың бесінші раундтағы ауыр соққыларынан кейін Сироткин жекпе-жекті жалғастырудан бас тартып, жеңілгенін мойындады. Осылайша, Мейірім Нұрсұлтанов WBO International белдігінің иегері атанды.
Бұл отандасымыздың кәсіпқой бокстағы 16-шы жеңісі. 2016 жылдан бері кәсіпқой рингте жұдырықтасып келе жатқан Мейірім осы уақыт аралығында 15 мәрте шаршы алаңға көтеріліп, барлығында жеңіске жетті. Сегіз бәсекені мерзімінен бұрын аяқтаған еді.
