Ересектермен қатар балалардың да індет қармағына ілігуі жиілеп барады. Қашықтан оқытылып, сақтық шаралары мейлінше сақталса да, дерт дендеуі бәсеңситін емес. Деректерге көз салатұғын болсақ, жаман тұмау басталғалы өңірдегі мектеп оқушылары арасында індет жұқтырудың 6 066 жағдайы тіркелген. Демек, бұл орайда әлі де жұқпалы ауру жұқтырудың қаупі мол.
Кейінгі тәуліктерде стационарда емделіп жатқан сырқаттардың саны 2,2 есеге азайды. Бұл жай инфекциялық ауруханалардағы төсектік орын санын ептеп қысқартуға мүмкіндік туғызып отыр. Күрделі кезеңдегі медициналық мекемелердің жағдайы туралы сөз сабақтай кетелік. Барлық аурухана оттегімен тыныстау аппараттарымен қамтамасыз етілген. Бұл орайда орталықтандырылған жүйенің де бар екенін, оған қоса 1 171 концетраторлар алынғанын айта кеткен жөн. Қазір 17 инфекциялық стационар жұмыс істеп тұр. Өкінішке қарай, осы жылдың басынан бері дауасыз дерт салдарынан 27 адам өлімі тіркелді. Әзірге медицина кадрларына тапшылық жоқ. Егер індет үдеп кететін болса, 330 сала қызметкері білек біріктіріп жұмыс істеуге дайын тұр.
Денсаулық сақтау саласы нысандарының материалдық-техникалық базасын нығайту мақсатында республикалық және облыстық бюджет есебінен 1,5 млрд теңге қаражат бөлініп, 221 бірлік медициналық жабдық сатылып алынды. Бүгінгі таңда өңірде 447 өкпені оттегімен желдету аппаратуралары бар. Компьютерлік томографтармен 9 медициналық ұйым жабдықталған.
Бір дәтке қуаты, емхана дәрігерлері қашықтан жұмыс істеп және онлайн консультациялар жүргізе алады. Осының өзі жедел жәрдем жүктемесінің 15 пайызға азаюына мүмкіндік тудырып отыр. Рас, ел шетіне індет жеткенде жедел жәрдем шақырудың өзі қиындап кеткен. Қазір бұл тараптағы арыз-шағым азайды. Шұғыл көмек көрсету үшін 140-тан аса мобильді бригада тұрақты жұмыс істеуде. Оған қосымша 41 автокөлік тартылып отыр. Осы жылдың қаңтар айында мобильді бригадалар сырқаттардың шақыруы бойынша 7 мың мәрте шығып, көмек көрсеткен. Кейінгі аптаның өзінде өңірде 5 794 шақыру тіркеліп отыр. Осы бір дерекке қарап-ақ ел ішіндегі дерт деңгейін анықтауға болады. Облыс орталығының өзінде жәрдем сұрап шақыратындардың саны өткен аптада 5,6 пайызға көбейген.
Облыста сұранысқа ие дәрі-дәрмектің екі айлық қоры жасақталған. Індет басталғалы өңірде жұқпалы аурулардан емдейтін стационарлар үшін 1,8 млрд теңгенің дәрі-дәрмегі сатылып алынған. Оған қоса жергілікті бюджет есебінен «жаман тұмаудан» емдеуге арналған дәрі-дәрмектің жеке қоры құрылды. Емханалар арқылы дәрі-дәрмекпен қамтамасыз ету жүйелі жүргізілуде. Қазіргі уақытта емханаларда оның мол қоры бар. 2020 жылдан бастап облыста тапшылығы байқалған кейбір дәрі-дәрмекті сатып алу үшін 500 млн теңге қаржы бөлініп, тұрақтандыру қоры жасалды. Дәріханаларда вирустық ауруларды емдейтін қажетті дәрі-дәрмектің барлығы бар әрі қолжетімді. Өңірде 352 дәріхана тұрақты жұмыс істейді. Сұранысқа ие дәрілерді уақтылы сатып алып жеткізу үшін келісімшарт жасалған. Бөлшек сауда желісі мен көтерме сауда қоймаларындағы дәрі-дәрмекке тұрақты мониторинг жүргізіліп тұрады.
Бүгінгі таңда 8 зертхана коронавирустық зерттеулерді қамтамасыз етуде. Мұнда тәулігіне 3 мыңға жуық тест жүргізіледі. Сөз арасында осы жылдың басынан бері 60 мың тест өткізілгенін айта кетелік. Осыншама халықтың 28 пайызы оң нәтиже көрсеткен. Егер қажет болатын болса, зертханалардың резервтік қуаты тәулігіне 7 мыңға жуық тест жүргізуге жетеді.
Аурудың алдын алу ең алдымен вакцинаға байланысты екені туралы сан мәрте айтылды. Денсаулық сақтау министрлігінің жоспарына сәйкес, облыста 479 160 адам вакцина алуға тиісті болса, күні бүгінге дейін бірінші компонентпен 378 адам егілген. Бұл – жоспардың 72 пайызы. Екінші компонентпен 321 мың адам немесе алдын ала жоспарланған көлемнің 67 пайызы екпе қабылдап отыр. Демек, бұл арада әлі де олқылық бар деген сөз. Күні бүгінге дейін 73 814 адам қайта екпе алды. Көрсеткіш көңіл көншітпейді. Бұл – жоспардың небәрі 34,7 пайызы ғана.
Ақмола облысы
