Комиссияның жұмысы басталғаннан бері барлығы 456,1 млн теңге сомаға 260 өтінім мақұлданса, оның ішінде бюджет қаражатынан 157,1 млн теңгеге 108 өтінім, қор қаржысынан 299 млн теңгеге 152 өтінім қанағаттандырылды. Бірінші кезекте 5 млн теңгеге дейінгі төлем сомасымен майда және шағын бизнестен түскен өтінімдер жедел қаралуда.
Аймақтық комиссия бизнеске келтірілген шығынды өтеу жөніндегі қолданыстағы тетікке түзетулер енгізуді жалғастырып жатқанын бұған дейін де хабарлаған едік. Мәселен, егер бұрын өңірлік комиссияның ұсынысы бойынша өтемақы жеке аудиторлар мен бағалаушылардың қызметтеріне арналған шығындарды қамтыса, енді сот сараптамасын жүргізу үшін бюджет қаржысы есебінен жеке адвокаттарға арналған шығындар да төленуі мүмкін.
«Қылмыстық іс жүргізу кодексінің қолданыстағы нормаларына сәйкес сот сараптамасын жүргізуге материалдарды дайындауға тергеуші ғана емес, оның сұрауы бойынша адвокат та жіберіледі. Қазіргі кезде тергеушілердің жұмысы көп екенін ескере отырып, сот сараптамасын жүргізуді жеделдету және өтемақы төлемін алу мақсатында тәртіпсіздік кезінде зардап шеккен кәсіпкерлерге жеке адвокаттардың қызметіне жүгінуді ұсынамыз. Қазір кәсіпкерлер бұл қызметтерді өз қаржысы есебінен төлей алады, алайда біз бюджет қаражаты есебінен шығынды өтеуге адвокаттық қызметтерге арналған шығыстарды қосу жөнінде ұсыныс әзірлеп жатырмыз. Бұл шара зардап шеккен бизнеске мемлекеттік қолдау көрсетуді кеңейтуге және қала экономикасын одан әрі қалпына келтіруді жеделдетуге мүмкіндік береді», деді ШОБ субъектілеріне келтірілген залалды өтеу жөніндегі өңірлік комиссияның төрағасы, Алматы қаласы кәсіпкерлік және инвестициялар басқармасының басшысы Еркебұлан Оразалин.
АЛМАТЫ
