ҚОҒАМДЫҚ МӘРТЕБЕ СЕНАТТА ҚОЛДАУ ТАПТЫ

Кеше Сенат Төрағасы Қасым-Жомарт Тоқаевтың төрағалығымен палатаның кезекті пленарлық отырысы болып, күн тәртібінде сегіз мәселе қаралды. Солардың алғашқы екеуі еліміздің Тұңғыш Президенті Н.Ә.Назарбаевтың қоғамдық мәртебесін Елбасы ретінде заңнамалық бекітуге қатысты болды. Бұған дейін Мәжіліс тарапынан қол­дау тапқан “Қазақстан Республикасының кейбір конституциялық заңдарына Қа­зақстан Республикасы Тұңғыш Прези­денті­нің – Елбасының қызметін қамта­масыз ету саласында заңнаманы жетілдіру мәселелері бойынша өзгерістер мен то­лықтырулар енгізу туралы” Конститу­ция­лық Заңның жобасы мен “Қазақстан Рес­публикасының кейбір заңнамалық акті­ле­р­і­не Қазақстан Республикасы Тұңғыш Президентінің – Елбасының қызметін қамтамасыз ету саласында заңнаманы же­тілдіру мәселелері бойынша өзгерістер мен толықтырулар енгізу туралы” заң жо­басын (бірінші оқылым) Мәжіліс депу­таты Розақұл Халмұрадов таныстырды. Заң жобасы бастамашыларының бірі халықаралық қоғамдастық қашанда ұлтты, халықты озық тұлғалары арқылы тани­тындығын алға тартты. Олай болса, қазақ елін, қазақ жерін, тәуелсіз Қазақ мем­ле­кетін әлемге танытқан Тұңғыш Президент Н.Назарбаев. Талай қиындық пен қыл көпірден әупірімдеп халқын аман алып өтіп, өзі құрған мемлекетті жетелеп, әлем­нің озық елдерінің қатарына қоса бас­та­ғаны теңдесі жоқ ерлік, әлемдік қоғам­дастық әлдеқашан мойындаған ақиқат, деп санайды Розақұл Сатыбалдыұлы. Баяндама аяқталысымен сенаторлар заң жобаларына қатысты пікірлерін ортаға салды. Орынбай Рахманбердиев Кеңес Одағы ыдырағаннан кейінгі өтпелі кезеңнің қиындықтарын тілге тиек ете келіп, былай деді: “Осындай қиын-қыстау жағдайда, сын сағаттарда еліміздің бағына орай билікте үлкен тұлға тұрды. “Халықты жасайтын тарих, тарихты жасайтын жеке тұлғалар” деген қағидалы сөз бар. Қазақстан Республикасының Тұңғыш Президенті Н.Ә.Назарбаев осындай тұлғалардың бірі де бірегейі”. Бұдан кейін сөз алған Иран Әміров мемлекетіміздің ішкі және халықаралық жетістіктері Тұңғыш Президенттің дара тұл­ғасымен байланысты екендігіне ерек­ше тоқталды. “Қазақстан Респуб­ли­ка­сы­ның Президенті Достастық ел­де­рі ішінде “әйгілі саясаткер” деп танылды. Нұрсұл­тан Назарбаев заңды түрде қазіргі заман көшбасшысының эталонына айналды. Оның бойында зияткер­лік-жаңашылдық, ұлттық бедел бар”, деді сенатор. Нәти­же­сінде негізгі заң жобасы тұтастай қолдау тауып, ілеспе заңдық құжат екінші оқы­лымда қарау үшін күн тәртібіне енгізіліп барып қабылданды. Осы ретте сенаторлар да, Сенат Төр­аға­сы да заң жобаларының маңызын ерек­ше ашып көрсетті. Тұңғыш Прези­дент – Елбасы ту­ра­лы заңның қабыл­да­нуы Қазақ­стан­дағы мемлекет құрылы­сын­дағы аса маңызды кезең болып табы­ла­ды. Бұл – Президент Н.Назарбаев­тың мәртебесіне байланысты мәсе­лелерді заңдық тұрғыда бекітетін ерекше заң. Тек Қазақстан азамат­тары ғана емес, шетелдік қай­рат­керлер де Президенттің күшті көш­басшылығының арқасында Қазақ­стан табысты дамуға қол жеткізді, ядролық қаруды таратпау режімін бекітуге, халық­аралық және аймақ­тық қауіпсіздікті нығайтуға зор үлес қосты деп санайды. Президент бұрынғы кеңес империясының қирандысынан шыққанымен тиімді әрекет ететін мемлекет құра алды. Қа­зақ­стан экономикалық дағдарыс­тан аз ғана шығынмен шықты және тұрақты даму үр­дісін сақтап қалды. Президентке Елбасы мәр­тебесін бекітетін заңды қабылдай отырып, Парламент Қазақстан халқы ал­дындағы қызметі орасан зор Нұрсұлтан Әбішұлының көр­нек­ті мемлекет қайрат­кері ретінде сіңірген еңбегін лайықты бағалады. Сондай-ақ отырыста “Қазақ­стан Рес­публикасының Үкіметі мен Ресей Феде­рациясының Үкіметі арасындағы Ресей Федерация­сы­ның “Байқоңыр” кешенін жалға алу жағдайында Байқоңыр ғарыш айлағының персоналына, Байқо­ңыр қаласының, Төретам және Ақай кенттері­нің тұрғындарына медициналық қызмет көрсету тәртібі туралы келісімді ратифи­ка­циялау туралы”, “Қазақстан Рес­пуб­ли­ка­сының Үкіметі мен Фин­лян­дия Республикасының Үкіметі арасындағы Табысқа салынатын салықтарға қатысты қосарланған салық салуды болдырмау және салық салудан жалтаруға жол бермеу туралы келісімді және оған қатысты хаттаманы ратификация­лау туралы”, “Қазақстан Респуб­ликасы мен Испания Корольдігі арасындағы Стратегиялық әріптес­тік туралы шартты ратифика­ция­лау туралы”, “1995 жылғы 23 желтоқ­сан­­дағы Қазақстан Республикасы мен Ресей Федерациясы арасын­да­ғы Байқоңыр қаласының мәртебесі, ондағы атқарушы өкімет органда­рын құрудың тәртібі мен олардың мәртебесі туралы келісімге өзгеріс­тер мен толықтырулар енгізу ту­ралы хаттаманы ратификациялау туралы” заңдар қабылданды. Асқар ТҰРАПБАЙҰЛЫ.