«Қарғалы» сүзгі стансасының құрылысын биыл шілде айына дейін аяқтау жоспарланған. Жаңа станса ауданның 40 мыңнан астам тұрғынын сумен қамтамасыз етеді. Бұл – Қарағайлы, Қарғалы, Тастыбұлақ, Құрамыс шағын аудандары. Бұған дейін аудан тұрғындарына жағдай жасау үшін «Халықтың бюджетке қатысуы» бағдарламасы арқылы балалар, ойын және спорт алаңдары салынған болатын. Ендігі жерде бағдарламаны қаржыландыру 500 млн теңгеге (1,8 млрд теңгеге дейін) ұлғайтылмақ.
Қарағайлы шағын ауданындағы дәрігерлік амбулаторияның апатты ғимаратына қатысты оң шешім қабылданды. Нысан сейсмикалық қауіпті және 2018 жылы пайдалануға жарамсыз деп танылған. Сондықтан амбулатория орнына «Әлеуметтік қызметтер үйі» жобасы үлгісінде көпбалалы аналар үшін әлеуметтік нысан салынады.
Құрамыс шағын ауданындағы мемлекеттік меншіктегі жерлерде (6 га) емхана мен балабақша салу үшін жобалық-сметалық құжаттамасы әзірленуде. Биыл Тастыбұлақ шағын ауданында ұзындығы 4,5 км жол асфальтталуы тиіс.
Қаладағы бау-бақша қоғамдастықтарының мәселесі өзекті, осыған байланысты аудан әкімдіктері Қалалық жоспарлау және урбанистика басқармасымен бірлесіп олардың мәртебесін наурыз айының соңына дейін анықтайды. Сондай-ақ Тастыбұлақ және Ақжар шағын аудандарындағы су құбыры мен кәріз желілеріне қосу үшін жаңа жобаға бау-бақша қоғамдастықтарының ескерілмеген көшелерін енгізу қажет.
Қала әкімі Е.Досаев биыл наурыз айында балаларды қабылдайтын Ақжар шағын ауданындағы 120 орынды жаңа балабақшаны аралап көріп, кеңес барысында мектеп пен бассейні бар 15 га дене шынықтыру-сауықтыру кешенін салу мәселесін шешуді тапсырды. Төле би көшесі мен Абай даңғылын ұзартудың жай-күйін тексеріп, жер учаскелерін сатып алу процесін жеделдету және осы жобаларды 2022-2023 жылдары кезең-кезеңімен іске асыруды бастау қажеттігін атап өтті. Наурызбай ауданының әкімшілік орталығына дейін метрополитенді жобалау мәселесі қаралды.
Сонымен қатар биылғы қыркүйек айында Абай шағын ауданындағы («Алма Сити-5» ТК, «Qazaq Stroy» мердігерлік ұйымы) 1200 орынды мектеп құрылысын пайдалануға беру, Шұғыла шағын ауданында (Алатау даңғылы және «Алем Сити» ТК) қосымша екі мектепті іске қосу жоспарланып отыр. Жалпы ауданда 2022 жылы барлығы 8 390 орынды 7 мектеп және 1 320 орынды 5 балабақша салу қарастырылған.
АЛМАТЫ
