Таяуда өткен Үкіметтің кеңейтілген отырысында Мемлекет басшысы Қасым-Жомарт Тоқаев майнинг орталықтардың жұмысын реттеуді тапсырған болатын. Тапсырманың алғашқы нәтижесі – осы.
Қаржы мониторингі агенттігі тексеру жұмыстары барысында Екібастұз ГРЭС-1 кәсіпорны аумағында майнинг дата-орталықтардың үздіксіз жұмыс істеуі үшін электр энергиясын заңсыз тұтыну мен сату ісі ұйымдастырылып келгенін анықтаған. Электр энергиясы жекеменшік компания арқылы екі кәсіпорынға тұрақты түрде таратылып келген. Компанияның «Рұқсаттар мен ескертулер туралы заңға сәйкес рәсімделген ешқандай лицензиясы болмай шықты. Стансадан электр жарығын «өндірістік қажеттілік ретінде» деп кәдеге жаратыпты.
Әрине, мұндай жағымсыз ақпарат Екібастұз ГРЭС-1 сияқты алпауыт кәсіпорынға абырой әпермейтіні түсінікті. Іле-шала станса басшылығы ресми жауап берді.
– Екібастұз ГРЭС-1 өндірістік алаңдарында ешқандай бөгде ұйымдар немесе объектілер жоқ және бола алмайды. Станса аумағында майнинг фермалар табылды деген ақпарат шындыққа жанаспайды. Әңгіме стансаға жақын ұйымдарда анықталған майнинг дата-орталықтары туралы айтылып жатқан болуы мүмкін. Бірақ олар ГРЭС-1 аумағында орналаспайды. Әрі стансаның оларға ешқандай қатысы жоқ, – дейді кәсіпорынның баспасөз қызметі.
Не десек те, құзырлы органдар істі тергеуді жалғастыруда. Президент тапсырма бермесе, заңсыз әрекеттер әшкере болмай ма сонда? Энергетика министрлігінің ақпаратына сүйенсек, бұған дейін энергия беруші және энергияны өткізетін компаниялар майнинг орталықтардың орналасқан жері туралы ақпарат бермепті. Шынымен білмейді немесе жасырып келген. Бұл мәселе де жіті тексерілмек.
Павлодар облысы
