Сенатор Мұхтар Құл-Мұхаммедтің төрағалық етуімен өткен кездесуде ол Президенттің жыл басында берген тапсырмаларын уақтылы және сапалы заңнамалық қамтамасыз ету қажеттігін атап өтті.
Қорғаныс министрінің орынбасары Сұлтан Қамалетдинов берілген тапсырманы іске асыру барысы туралы депутаттарға айтып берді. Ол терроризмге қарсы операцияларды жүргізу және дағдарыстық жағдайларды басқарудың бірыңғай орталығын құру кезінде лауазымды тұлғалардың іс-қимылдарын заңнамалық деңгейде реттеу қажеттігі туралы айтты. Жастардың әскери қызметке деген ынтасын арттыруға, әскерге шақырылатын жастар мен әскери қызметшілерді тәрбиелеуде жаңа тәсілдер мен стандарттарды қолдануға байланысты шараларға ерекше назар аударды.
Сенатор Сергей Ершов өз сөзінде әрбір мемлекеттік органның рөлін, міндеттері мен функцияларын айқындай отырып, азаматтарды әскери-патриоттық тәрбиелеуді ұйымдастыру қажеттігін атап өтті. Ол сондай-ақ Қарулы Күштердің жауынгерлік және жұмылдыру дайындығын қажетті деңгейде ұстап тұру, күш құрылымдары арасындағы тиімді үйлестіруді қамтамасыз ету жөніндегі нормалардың өзара байланысы тұрғысында заңнамалық базаны жүйелеудің маңыздылығын сөз етті.
Кездесу барысында парламентшілер қорғаныс шығыстарын қаржыландыруға, сондай-ақ әскери ұжымдардағы сыбайлас жемқорлыққа қарсы іс-қимылға қатысты мәселелерді де көтерді. Сенаттың салалық комитетінің төрағасы Мұхтар Құл-Мұхаммед кездесуді қорытындылай келіп мүдделі мемлекеттік органдармен және жұртшылықпен жекелеген ұсыныстарды, оның ішінде әскерге шақыру мәселелерін шешуге, мерзімді әскери қызмет өткеруді ынталандыруға бағытталған ұсыныстарды келісудің маңыздылығын айтты.
