Ондыққа тиген он жол

Футбол. Астанада Еуропа фут­бол қауымдастығының (УЕФА) ке­зекті XXXVIII конгресі өтеді. Жиында Еуропадағы футболды дамыту мәселесі қаралады. Оған ФИФА президенті Йозеф Блаттер қатысып, сөз сөйлейді. Содан кейін ол Қырғызстан мен Тәжікстанға төрт күндік ресми сапармен барады. Осы елдерде ол бірнеше футбол алаңдарының ашылуына қатысады деп күтілуде. Теннис. Жақында Қазақстан құрамасы Дэвис кубогының ширек финалында Швейцария командасымен кездесетін құрамды жариялады. Бұл матчқа Қазақстанның ұлт­тық командасының капитаны Дияс Досқараев, Михаил Кукушкин, Анд­рей Голубев, Александр Недо­ве­сов пен Евгений Королевті шақырды. Кездесу 4-6 сәуір күндері Женевада өтеді. Авторалли. «Жібек жолы – 2014» раллиінің үш кезеңі Қазақ­стан аумағында өтеді. Жарыстар 4 шілдеде Мәскеу­дегі Қызыл алаңда басталып, 12 шіл­деде Астанада аяқталады. «Мәс­кеу – Чебоксары – Қазан – Бугульма – Орал – Бейнеу – Атырау – Астрахань» бағытында өтетін жолдың жалпы ұзындығы – 5 мың шақырым. «Жібек жолы» 2009 жылдан бері Ресей, Қазақстан және Түрік­менстан аумағында өткізіліп келеді. Хоккей. Қарағандының «Сарыарқа» командасы Красно­дар­дың «Кубань» хоккейшілерін жеңіп, Жоғары хоккей лигасы плей-офф сериясында жартылай финалға шықты. Бұл матчта «Сарыарқа» ойыншылары сырт алаңда «Кубаньді» 3:0 есебімен ұтты. Сөйтіп, төрт жеңіске дейін жалғасатын серияда қарсыластарын 4:0 есебімен ұтқан Қарағандының командасы жартылай финалға жолдама алды. Фристайл. Италияның Кьеза ин Вальмаленко қаласында Еуро­па кубогының қорытынды кезеңі өтті. Онда әйелдер арасында шаң­ғы акробатикасынан өткен сында қазақстандық Жанбота Алдабер­генова үздік үштікке енді. Келесі күні де ол акробатикалық секіруден үздік нәтиже көрсетті. Сөйтіп, жалпы есепте 350 рейтинг­тік ұпай жинап, екінші орынды иеленді. Таэквондо. Тайваньда жасөс­пірімдер мен жастар арасында өтіп жатқан әлем чемпионатында Қазақстан құрамасы алғашқы жүлдеге ие болды. Жастар арасында Артур Ким 48 кило салмақта күміс жүлдегер атанды. Осының алдында жасөс­пірімдер арасында өткен сында 48 килода Ғалымжан Елшібай үздік сегіздікке еніп, жасөспірімдер арасында өтетін Олимпиадаға жолдама алды. Биыл Олимпиада тамызда Қытайда өтеді. Грек-рим күресі. Кеше Алма­тыд­ағы «Достық» спорт кешенінде қазақ халқының даңқты балуаны Дәулет Тұрлыхановтың жүлдесі үшін дәстүрлі республикалық турнир басталды. Оған 1997-1999 жылдары туған балуандар қатысуда. Турнир бүгін кешке аяқталады. Осының алдында қазақтың атақты балуаны туған жері Шығыс Қазақстан облысында көпсалалы Болат Тұрлыханов атындағы спорт кешенін салып берген болатын. Баскетбол. «Астана» баскетбол клубының «ВТБ біріккен лигасының» плей-офф кезеңіндегі қарсыласы анықталды. Енді 1/8 финалда елордалық ко­манда Ресейдің «Нижний Нов­город» командасымен кезде­се­ді. Алғашқы матч Астанада өтеді. Осы сында қай команда екі рет жеңсе, ширек финалға шыға­ды. Оның келесі айналымдағы қар­сыласы «Химки» командасы болады. Волейбол. Тараз қаласында ұлттық лига командалары арасында өткен ел чемпионаты аяқталды. «Алматы» командасы алтын медаль үшін өткен соңғы ойын­да Оралдың «Конденсат-Жайықмұнай» клубын 3:1 есебімен ұтып, биылғы Қазақстан чемпионы атанды. Алматылықтар осымен ел чемпионы атағын кезекті рет жеңіп алды. Енді олар сәуір айында клубтық командалар арасында Азия чемпионатында Қазақстан намысын қорғайды. «Егемен-ақпарат».