23 жастағы Бахтиер Жамбыл облысының орталығында дүниеге келді. Әр жылдары еліміздің жасөспірімдер мен жастар құрамасында ойнаған ол 2017 жылы «Тараздың» жейдесін киіп, Қазақстан чемпионатының алғашқы маусымында премьер-лиганың ең үздік жас ойыншысына тиесілі арнайы сыйлықты иеленді. Сол жылы «Астанаға» ауысып, Суперкубоктың иегері атанды. Көп ұзамай жасыл алаңда жасындай жарқылдаған Зайнутдиновке Ресейдің «Ростов» клубы бапкерлерінің көзі түсті. Бір маусымды Дондағы Ростовта өткізген жартылай қорғаушы 2020 жылы ЦСКА-мен келсімшартқа отырды. Қазіргі кезде Бахтиер Зайнутдинов – Қазақстан ұлттық құрамасы мен Мәскеудің әйгілі әскерилер командасының белді ойыншысы. Жерлесіміздің трансферлік құны – 4 000 000 еуро.
Екінші орында – Александр Меркель. 29 жастағы Алматының тумасы кезінде ата-анасымен бірге Жетісу өңірінен Германияға қоныс аударған. Спортттық мансабын өзінің тарихи отанында бастаған ол кейіннен Италия, Англия, Швейцария, Германия, Аустрия, Нидерланд және Сауд Арабиясының чемпионаттарында бақ сынады. 2015 жылдан бері халықаралық додаларда Қазақстанның намысын қорғауда. Бұл күндері Меркель Түркияның «Газиантепінде» ойнауда. Амплуасы – жартылай қорғаушы. Александр 2 000 000 еуроға бағаланып отыр.
Үздік үштікті Нұрәлі Әліп түйіндеуде. Ол Ақтау қаласында туып-өсті. Бірер жыл Алматының «Қайратында» ойнаған 22 жастағы қорғаушыны биыл Санкт-Петербургтің «Зенит» клубы басшылары аттай қалап алды. Нева жағалауына қоныс аударған бетте қазақтың ұлы шеберлігімен көзге түсіп, жолдастық кездесулер барысында қарсыластар қақпасына маңызды голдар соқты. Қазіргі кезде Нұрәлінің трансферлік құны 1 700 000 еуроны құрап отыр. Егер ол дәл осы бетінен таймаса, онда алдағы уақытта қандасымыздың бағасы шарықтай түсетіні анық.
Сондай-ақ ең құнды «ТОП-10» футболшының қатарына мына ойыншылар еніп отыр: Марат Быстров («Ахмат», Ресей) – 900 мың, Ян Вороговский («Моленбек», Бельгия – 750 мың, Георгий Жуков («Висла», Польша) – 500 мың, Алексей Щёткин («Ротор», Ресей) – 400 мың, Акмаль Бақтияров («Олимп-Долгопрудный», Ресей) – 200 мың, Магамед Узденов («Абдыш-Ата», Қырғызстан) – 175 мың, Алексей Родионов («Алашкерт», Армения» – 150 мың, Арген Жұматаев («Нефтчи», Қырғызстан) – 150 мың және Ирисдавлат Хакимов («Алға», Қырғызстан) – 150.
