Арнаулы салық режімі: Салық есептілігін тапсыру және салық төлеу мерзімдері қандай?

Осылайша, патент негізінде арнаулы салық режімін қолданатын дара кәсіпкерлер үшін Салық кодексінде бір айдан бір жылға дейін патент құнының есеп-қисабын (911.00-нысан) ұсыну мүмкіндігі көзделген. Патент құнын және әлеу­меттік төлемдерді төлеуді салық төлеуші есеп-қисапты табыс еткенге дейін жүргізеді.

Арнаулы мобильді қосымшаны пайдалана отырып арнаулы салық режімін қолданатын жеке кәсіп­керлер салық есептілігін ұсынбайды. ЖТС және әлеуметтік төлемдер сомасы ай сайын арнайы мобильді қосым­ша арқылы есепті айдың 15-нен ке­шік­тірілмей есептеледі және есепті айдың 25-нен кешіктірілмей төленеді.

Оңайлатылған декларация негі­зін­де арнаулы салық режімін қол­данатын салық төлеушілер декларацияны (910.00-нысан) салық төлеу­шінің орналасқан жері бо­йын­ша мемлекеттік кіріс органына бірінші жартыжылдық үшін 15 тамыздан кешіктірмей (25 тамыздан кешіктірмей төлейді), екінші жартыжылдық үшін 15 ақпаннан кешіктірмей (25 ақпаннан кешіктір­мей төлейді) табыс етеді.

Бұл ретте, жұмыскерлердің табысынан жеке табыс салығын және әлеуметтік төлемдерді төлеуді ай сайын, табыстарды төлеген айдан кейінгі айдың 25-нен кешіктірмей жүргізетінін атап өту қажет.

Бірыңғай жер салығын төлеуші­лер дек­ларацияны (920.00-нысан) есеп­ті жылдан кейінгі жылдың 31 нау­рызынан кешіктірмей жер учас­кесі орналасқан жердегі салық органдарына табыс етеді.

Бірыңғай жер салығын, жерүс­ті көздеріндегі су ресурстарын пай­даланғаны үшін төлемақыны төлеу жер учаскесі орналасқан жер бойынша да мынадай тәртіппен жүргізіледі:

1) есепті кезеңнің 1 қаңтарынан 1 қазанына дейін есептелген сома­лар ағымдағы есепті кезеңнің 10 қара­шасынан кешіктірілмейтін мерзімде;

2) есепті кезеңнің 1 қазанынан 31 желтоқсанына дейін есептелген сомалар – есепті кезеңнен кейінгі есепті кезеңнің 10 сәуірінен кешік­тірілмейтін мерзімде. 2022 жылдан бастап бірыңғай жер салығының сомасы жергілікті өзін өзі басқару бюджетіне түседі.

Жалдамалы қызметкерлер үшін жеке табыс салығын және әлеу­меттік төлемдерді төлеуді табыс төлен­ген айдан кейінгі айдың 25-нен кешік­тірмей ай сайын жүргізу қажет.

Бөлшек салықтың арнау­лы са­лық режімін қолданатын са­лық төлеу­шілер декларацияны (913.00-нысан) салық төлеушінің орн­а­ласқан жері бойынша салық орга­нына есепті тоқсаннан кейінгі екін­ші айдың 15-күнінен кешіктірмей табыс етеді. Төлемді есепті тоқсан­нан кейінгі екінші айдың 25-нен кешіктірмей жүргізеді. Бұл ретте жалдамалы жұмыскерлердің табысынан жеке табыс салығын және әлеуметтік төлемдер ай сайын, табыстарды төлеген айдан кейінгі айдың 25-нен кешіктірілмей төленеді.