Қазақстан теннис федерациясының мәліметінше, бұл айтулы жарыста кезінде Роджер Федерер, Рафаэль Надаль, Гаэль Монфис сияқты мықтылар жеңімпаз атанған еді.
Дода барысында Заңғар әуелі аустриялық Максимиллиан Хейдельмайерді 7:6 (7:4), 6:3 есебімен жеңді. Сосын Францияның жасөспірімдер арасында бірінші ракеткасы Лени Кутурьені 7:5, 6:7 (5:7), 6:4 есебімен ұтты.
Ширек финалда Нұрланұлы Ресейдің жарық жұлдызы Сава Рыбкинге бірде-бір ұпай бермей 6:0, 6:0 есебімен таза жеңіске жетті. Ал жартылай финалда ливандық Даниэль Жадты 6:1, 6:2 есебімен ұтты.
Бүгін Заңғар Нұрланұлы финалда (елорда уақытымен сағат 20.00-де басталады) тағы бір франциялық Тимео Труфеллимен бас жүлдені сарапқа салады.
