«Рубльді қолдауға жұмсалуы мүмкін Ресейдің 630 млрд доллар алтын-валюта қоры бар және санкцияның мақсаты – Батыс банктерімен келісімдерді бұғаттап, бұл валютаны рубльге ауыстыруды мүмкін қылмау», деп хабарлаған еді Ақүй.
Телеграмдағы Tengenomika каналының сарапшылары бұл жағдайға мынадай түсініктеме береді: «Түрлі бағалау бойынша, Ресей Орталық банкінің валюталық-географиялық бөлінісін ескере отырып, қазіргі 630 млрд доллардың 60 пайызы Батыс елдерінің тікелей бұғаттауына тап болуы мүмкін. Ондай жағдайда Орталық банк резеврінің тек 40 пайызы ғана банк жүйесін қолдап, интервенция жасау үшін пайдаланылады. Сонымен қатар SWIFT-тен ажыратылған жағдайда халықаралық серіктестер үшін ресейлік экспорт – мұнай, газ, бидай, әскери қару-жарақ үшін төлем жасау қиындайды. Екі санкция да Ресейге және оның өңірлік серіктесі Қазақстанға да жақсылық әкелмейді. Рубль құлдырауы мүмкін. Бұл өз кезегінде теңгеге де қысымды күшейтеді».
Ресейдегі ахуалдың нашарлап, рубльдің құнсыздануы тауарлар мен қызметтердің қымбаттауына әкеліп соғады. Ал Қазақстан мен Ресейдің аса тығыз сауда серіктестері екенін ескерсек, мұның салқыны елімізге де тиеді. 2021 жылы екі ел арасындағы тауар айналымы 20 млрд доллардан асқан. Көптеген тұтынушылық тауарларды Ресейден сатып аламыз. Демек, Ресейде бағаның қымбаттауы Қазақстанда да қайталанады. Мұндай жағдайда инфляция импорты болуы мүмкін бе?
«Санкциялық қысымды ескерер болсақ, өзге елдерге, оның ішінде Қазақстанға да экспортталатын тауарлар бағасының өсуі әбден ықтимал. Қазақстан импортында Ресейдің үлесі айтарлықтай. Сондықтан инфляциялық қысымды жоққа шығара алмаймыз. Біздің елдің жалпы импортындағы Ресей үлесі былтыр 42,1 пайызды немесе 17,3 млрд долларды құраған. Ұлттық банктің шұғыл түрде базалық ставканы 13,50 пайызға өсіргенін естен шығармайық. Бұл әлемдегі энергия тасымалдаушылардың рекордтық жоғары бағасына байланысты нарықтағы проинфляциялық ахуалға қарсы қосымша қолдау көрсетуі мүмкін», дейді сарапшы Андрей Чеботарев.
Теңгенің жаңа бағамы бүгін белгілі болады. Өткен аптаның соңында теңге курсы 467 теңгемен аяқталған. Kurs.kz сайтындағы мәлімет бойынша, 1 долларды орташа айырбастау бағамы 463 теңге деп көрсетілген.
