Үкіметте кәсіпкерлерге қатысты заң жобасы қабылданды

Бүгін, 28 наурыз күні Премьер-Минстр Серік Ахметовтің төрағалығымен Үкімет отырысы өтті. Онда Үкімет мүшелері «Рұқсаттар және хабарламалар туралы» және «Қазақстан Республикасының кейбiр заңнамалық актiлерiне рұқсат беру жүйесi мәселелерi бойынша өзгерiстер мен толықтырулар енгiзу туралы» заң жобасын бір ауыздан қабылдады. Бұл туралы Egemen.kz тілшісі хабарлады. Отырысты ашқан С.Ахметов дайындалған заң туралы баяндау үшін  Өңірлік даму министрі Болат Жәмішевке сөз берді. «Бұл заң жобасы үш бөлiмнен тұрады. Оған «Лицензиялау туралы» заң толығымен ендi. Заң жобасының бұл бөлiмiнде саладағы бүгiнгi мәселелер ескерiле отырып, пысықталады. Сондай-ақ, заң жобасында «Әкiмшiлiк рәсiмдер туралы» ҚР Заңынан хабарламалар туралы ережелер толығымен қамтылды. Заң жобасының 3 бөлiмi толық қайта жазылып, лицензия болып табылмайтын рұқсат рәсiмдерiнiң мәселелерiн регламенттейдi», дедi министр Б. Жәмішев. Жиында сөз алған Ұлттық кәсіпкерлер палатасының төрағасы Абылай Мырзахметовтің мәлімдеуінше, бұл заң тиісті мемлекеттік органдар мен кәсіпкерлер және бірқатар қоғамдық ұйымдар қатыса отырып, әр тарауы мұқият зерделеніп, әзірленген. Нұрбай Елмұратов. Дереккөз: Egemen.kz. Фото: www.Neffegaz.kz.