Жақсылық жасау – адам бойындағы асыл қасиеттердің бірі екенін білді. Жақсы адам қол ұшын беруге, жәрдем етуге, жанашырлық танытуға, көмек көрсетуге, қолдау жасауға әрдайым дайын тұратынын өз басынан өткерді. Ересектерден ерекше үлгі алды, өзі де ертеңгі күні жақсылық жасауға жақын тұратын болады. Ал бүгінде Оразымбеттің жомарт жандарға айтар алғысы шексіз.
«Баспана болса ғой, өскенде бергендеріңді қайтарып берем, шын айтам» деп арманын айтқан 9 жастағы Оразымбеттің сөзі көпшілікті тебіренткені, ойландырғаны анық. Жүрегі нәзік, аса сезімтал баланы мұңды еткен ахуалға тереңдемей-ақ қоялық. Көпшілікті жылатқан Оразымбет қарт әжесімен, зағип анасымен, екі мүгедек ағасымен бірге тұрады. Отбасы қабырғалары бүлінген, сылағы түскен үйді жалға алып отырған. Төртінші сыныпта оқитын Оразымбеттің анасы Бақытгүл – бірінші топ мүгедегі, көзі көрмейді. Жасы кіші болса да, ерте есейген бала мектептен ерте шығып, анасына, екі ағасына көмектесетінін айтады. Қарны ашқан күндері сыныптастарынан қарыз сұрайтынын да жасырмайды. Көпшілікке жария болған көрсетілімде ол өзінің бір-ақ арманы бар екенін жеткізді. «Менің бір-ақ арманым бар, оны орындасаңыздар, өзім де қайтарып берем. Тек бір ғана баспана алып берсеңіздер, жетеді. Анам да, мен де қиналдым. Анамның көзі көрмейді, ағам да ауырады, екінші ағам да кемтар. Әжем де қартайып келеді, жасы келіп. Өтініш, көмектесіңіздерші. Бір баспана болса да жетеді. Өскен кезімде қайтарып беремін. Шынымды айтам», деді ол. «Харекет» қайырымдылық қорының белсенді мүшесі, актер Мадияр Серікбаевтың айтуынша, оған түнделетіп видео-хабарлама келген. Актер бейнетүсірілімді көріп, бейжай отыра алмағанын айтады.
Қазақ елінде қайырымды жан көп. Солардың басын қосып, мұқтаж жандарға қол ұшын беріп жүрген «Харекет» қайырымдылық қоры Оразымбетке Шымкент қаласынан 5 бөлмелі үй сыйлады. Одан бөлек баланың анасы Бақытгүлдің көзін тегін емдетуге сертификат табыс етілді. Сондай-ақ Оразымбеттің өзіне су жаңа компьютер мен 5 миллион теңгеге сертификат берілді. Бұл қаражатты бала 18 жасқа толғаннан кейін қажетіне қарай жарата алады. Осындай жұрт сүйсінерлік игілікті іс жария болған «Түнгі хабар» бағдарламасында есімі елге мәлім әнші Сәкен Майғазиев Оразымбеттің ересек азаматтардың сөзін айтқанын жеткізді. «Әлеуметтік желі арқылы өздеріңіз көрдіңіздер, бәріміз тебірендік. Бала арманы орындалсын. Бір-ақ нәрсе айтқым келеді, Алланың қалауымен сол армандарың орындалып жатса да, ел-жұрт болып жұмылып, жылу жинап, өз ағайындарың, бауырларың өзекке теппей, көмектесіп жатқан жағдайда да, ол сыйлық болады. Ал енді соны қайтарамын деген райыңнан қайт, айналайын. Күллі қазақ саған сол дүниені қайтарып беру үшін емес, Алланың разылығы үшін өзіміздің ағайын-туысқандар беріп жатыр деп қабылда», деді Сәкен Майғазиев.
Армандарының орындалғанына сене алмаған Оразымбет көз жасын жасыра алмады. Бала көңіл толқып, айтқысы келген жүрек сөзін толық жеткізе алмады. «Баршаларыңызға рахмет! Алладан қайтсын», деумен болды. Ал Оразымбеттің нағашы әжесі: «Жетімді жебегеннің алдынан жеті пейіштің есігі ашылады. Тілектерің қабыл болсын!», деп аналық батасын беріп, алғысын білдірді.
Оразымбет зағип анасының қолынан жетектеп, жаңа үйдегі барлық бөлмелерді таныстырған. Үйдің сыртындағы кең аулаға қияр, қызанақ пен басқа да көкөністер және гүл екпек. Ертеңгі күніне сенімді баланың іске асырғысы келетін жоспары көп.
ШЫМКЕНТ
