Ресей президентінің баспасөз хатшысы Дмитрий Песков әуе соққылары қарапайым тұрғындарға бағытталғаны туралы ақпарат өтірік деп айтты. Дегенмен, әлеуметтік желілердегі видеоларда Украина қалаларына рұқсат етілмеген вакумдық және кассеталық бомбалармен, қанатты зымырандармен атқылап жатқаны байқалады. Мәселен, видеолардың бірінде Харьковтың дәл ортасына түскен зымыранның көп дүниені бүлдіргені анық көрінеді. Сондай-ақ қарапайым тұрғындардың үйінің қирандылары да жиі жарияланып жатыр.
Біріккен Ұлттар Ұйымының адам құқықтары жөніндегі кеңсесінің (OHCHR) мәліметіне сүйенсек, өткен аптада Ресей әскері Украинаға басып кіргеннен бері кемінде 136 бейбіт тұрғын қаза тапқан. Соның ішінде 13 бала бар. Шамамен 400-ге жуық адам жараланды.
OHCHR баспасөз хатшысы Лиз Тросселл қаза тапқандардың көпшілігі Украинаның шығысындағы Донецк және Луганск облыстарының тұрғындары екенін жеткізді. Алайда шығын бұдан әлдеқайда көп болуы мүмкін.
Ұлыбритания барлау қызметі таратқан деректерге сүйенсек, басқыншы әскердің Киевке қарай жылжуы баяулап қалған. Сондықтан ел астанасын артиллериямен атқылап жатыр. Украинаның оңтүстігіндегі Херсон қаласының мэрі шаһарды ресейлік сарбаздар қоршап алғанын хабарлады.
НАТО басшысы Йенс Столтенберг Ресейді Украинадағы соғысты тоқтатып, барлық күштерін шығаруға шақырды. Сонымен қатар альянс Киевті қолдау мақсатында әскер немесе әскери ұшақ жібермейтінін жеткізді.
«НАТО – қорғанысқа арналған одақ. Біз Ресеймен қақтығысқымыз келмейді. Ресейден дереу соғысты тоқтатып, Украинадан барлық күштерін шығарып, мәселені дипломатиялық жолмен шешуге шақырамыз», деді Йенс Столтенберг.
Ұлыбритания премьер-министрі Борис Джонсон «Еуропа құрлығы апатқа тап болды» деп мәлімдеді. Варшаваға барған сапарында ол Польша үкіметі мен халқы гуманитарлық дағдарысты шешуге мол үлес қосып жатқанына тоқталды.
Осы орайда Ұлыбританияда консерваторлар мен оппозициялық депутаттар Үкіметті қысымға алып, украин босқындарын қабылдауға кірісуді талап етті. Премьер-министр сондай-ақ Украина президенті Володимир Зеленскийдің «көшбасшылығы мен ерлігіне» құрмет көрсететінін атап өтті.
Еуропалық парламентте Украинадағы ахуалға байланысты тыңдалым өтіп, аталған елдің президенті Володимир Зеленский бейне-режімде қатысты. Депутаттар басқыншылармен күресте ерік-жігер көрсетіп жатқан Зеленскийге бір минут бойы тік тұрып, қол шапалақтап құрмет көрсетті. «Бүгін сіздерге қайырлы таң, қайырлы күн немесе қайырлы кеш деп айта алмаймын. Себебі кей адамдар үшін әр күн қайырлы болып жатқан жоқ. Кейбірі үшін бұл күн ақырғы күнге айналды», деді ол.
Сондай-ақ Зеленский Ресейдің тек әскери нысандарға шабуыл жасаймыз деген мәлімдемесін жоққа шығарды. «16 баланы өлтірдің. Қай әскери базада балалар бар? Қай бала танк айдап жүр екен?», деді ол.
Дүйсенбі күні Украина басшылығы Еуропалық одаққа ену туралы өтініш жасады. Ұйым аталған елді құрамына енгізу процесі жедел жүретінін, қазіргі таңда оны қарастырып жатқанын атап өтті. ЕО-ға мүше бірқатар мемлекет бұл ұсынысты қолдайтынын мәлімдеді.
Сонымен қатар Еуропалық парламент ұйымның Ресейдің мұнайы мен газын импорттауды шектеуге шақырды. Депутаттар Кремльдің басқыншы қадамына қарсы жауап ретінде қатаң санкциялар енгізуді талап етіп отыр. Құжатта Еуропалық одақтың порттарына Ресейге баратын кемелерді кіргізуден бас тарту жөнінде айтылған.
Maxar компаниясы спутниктен түсірілген суреттерге сүйене отырып, Киевке солтүстік-батыс бағытта шамамен 64 шақырымға созылған Ресейдің әскери колоннасы келе жатқанын хабарлады.
Ресейге санкция салғандар саны күннен-күнге артып барады. Тіпті саясатқа қатысы жоқ компаниялар да ауылын алыс қондыруды жөн санады. Мәселен, Disney компаниясы Batman фильмін Ресейде көрсетуден бас тартты. Mastercard компаниясы елдегі бірқатар қаржы институтының жұмысына тыйым салынғанын хабарлады.
