Аманат – қасиетті, салмағы мен жауапкершілігі ауыр ұғым. Бабам қазақ күнделікті өмірде «Аманат» сөзін қалай болса солай, қисапсыз қолдана бермеген. Себебі бұл сөздің артында айтқан адамға да, айтылған адамға да салмағы мен жауапкершілігі, сұрауы бар екенін жақсы сезінген.
Біз үшін елдің бірлігі мен жердің тұтастығы – Аманат! Сан ғасыр аңсап жеткен тәуелсіздігіміз – Аманат! Тілімізді, дінімізді, дәстүр-салтымызды бұзбай таза ұстау – Аманат! Жас ұрпаққа дұрыс тәрбие беру, Отанын, ұлтын сүюге баулу – Аманат!
Жер тағдыры – елге аманат, ел тағдыры – көш бастаған ерлерге Аманат! Ал ақ жаулықты ананың, ақ сақалды әкенің, ақ пейілді баланың аманаты қашанда биліктің мойнында. Аманат қиянат жасамау – саяси ұйымның ең басты парызы. Ендеше, халық аманатына адал болу – Amanat партиясының ең негізгі ұстанымы болуы шарт.
Президент айтқандай, Amanat саяси құрылымы ел мүддесін қорғайтын нағыз халықшыл партия болуы керек. Партия хатшысы Асхат Оралұлының баяндамасында көрсетілген саяси құрылымды модернизациялау бағдарламасы болашақта оң нәтижелерге қол жеткізгенін тілейміз.
Партия игілікті жеңістер мен жетістіктерге, сенімге ие болу үшін жалған пафос пен мақтаншақтықтан, құрғақ уәдеден аулақ болуға тиіс. Amanat партиясы – әділеттілік пен шынайылықтың шырақшысы болсын. Билік алдында талапшыл, халық алдында қамқоршы келбетімен қуантсын.
Жаңа Қазақстанның кемелденуі жолында нақты нәтижелерге қол жеткізсін. Тартысқа толы саясат алаңында ел аманатына адал болсын!
Аманжол ӘЛТАЙ,
айтыскер ақын
