Рахат ақпараттық технологиялар бойынша маман атанып, бірнеше жыл жеке компанияның бірінде веб-маман болып жұмыс істеді. Сондай-ақ бейнемонтаж негіздері бойынша үш айлық курсты оқып шықты.
– Көптеген компанияның кеңселері арбадағы адамдар үшін бейімделмеген соң олардың жұмысқа алуға мүмкіндігі жоқ. Мен үнемі қозғалыста болғым келді, белсенді түрдегі жұмыс ұнайды. Ұзақ уақыт бойы жұмыс іздеп, өз бизнесімізді ашу ең оңтайлы іс болады деп шештім. Аудандық кәсіпкерлер палатасына жүгініп, онда маған жан-жақты кеңес беріп, мемлекеттік қолдау шараларымен таныстырды. Ерекше қажеттіліктері бар азаматтардың табысты кәсіпкер атанып жатқанын жеткізді. Табысты оқиғалар мені шабыттандырып, жеке кәсібімді ашамын деген үміт сыйлады. Осылайша, «Бастау бизнес» оқыту жобасына жазылып, оқуды аяқтағаннан кейін 200 АЕК көлемінде грант ұтып алдым, – дейді кейіпкеріміз.
Рахат грант қаражатына уақ мал сатып алып, қазір 12 қойды өз ауласында бағып отыр. Алдағы уақытта жылқы сатып алуды ойлап жүр. Үй маңындағы бау-бақшада жоңышқа өсіреді. Әрине, арбаға таңылған адам түгілі, мұндай істерді игеріп кету сау адамның өзіне сын. Ал бұл бағытта Рахатқа жақындары көмектесіп келеді.
Айтпақшы, Алматы облысында «Еңбек» бағдарламасы шеңберіндегі «Бастау Бизнес» кәсіпкерлік негіздерін оқыту жобасы бойынша бес жыл ішінде 16 мыңнан аса жұмыссыз және ісін жаңа бастаған кәсіпкерлер оқытылды. Өткен жылдары аяқтағандарды ескере отырып, жоба бойынша оқытылғандардың ішінен 6 328 бизнес-жоба мемлекеттік бағдарламалар бойынша гранттық қаржыландыру мен жеңілдетілген несие алған көрінеді.
Соның бірі – Рахат Қадырбеков. Кәсіпкер қолдау білдірген жандарға риза. Ол мемлекетке, заманына, қайырымды адамдарға, ат үстіндегі азаматтарға үнемі алғыс айтып отырады.
Алматы облысы
