Мәжілістің жалпы отырысынан кейін журналистер Палата төрағасына басқарушы партияның жаңа атауын тіркеуге қатысты бірқатар сұрақ қойды.
Палата Спикері атап өткендей, заңнама тұрғысынан тіркеу процесінде қиындықтар болмайды.
«Біз мәселені зерттеген кезде «Аманат» деп аталатын 30-дан астам түрлі ұйым бар екені белгілі болды, бірақ бұл атаумен ешқандай партия тіркелген жоқ. Сондықтан, «AMANAT» атты партияны тіркеуде қиындықтар болмайды деп ойлаймын», деп түсіндірді Ерлан Қошанов.
Мәжіліс Төрағасы «Nur Otan» партиясы бұрынғы атауынан неге бас тартқанын түсіндірді.
«Негізінде өмір мен қоғам өзгеріп жатыр, сіздер осыны көріп отырсыздар. Егер өткен жылдың желтоқсаны мен осы жылдың қаңтарында болған оқиғаға қарасақ, біз басқа мемлекетте тұрып жатқан сияқтымыз. Сондықтан бүгінде қоғамның сұранысы да өзгеруде. Қаңтар қасіретінен кейін қоғам да өзгерді. Ал партия мүшелері мұның бәрін ескере алды», деді ол.
Ерлан Қошанов атап өткендей, депутаттар тұрғындардың көңіл-күйлері мен сұраныстары назарға алынған өңірлерге барды. Бүгінде партияны ғана емес қоғамды да жаңарту қажеттілігі бар.
«Осының бәрін негізге ала отырып, партия мүшелері тиісті шешім қабылдады және партия Төрағасы оны қолдады», деп түйіндеді Мәжіліс Спикері.
