Іле бұл жарияланымға Мемлекет басшысы Қасым-Жомарт Тоқаев назар аударып, Қызылорда облысының әкіміне тиісті тапсырма бергеннен кейін сексеуілдік ата-аналарды көптен алаңдатып келген көкейкесті мәселе бірден оң шешімін тауып, облыстық бюджет қаражат есебінен аталмыш кентте 300 орындық жаңа мектеп салынды.
Ал осы проблеманы кешіктірмей шешу қажеттігі туралы алтыншы шақырылымдағы Парламент депутаттары Үкіметке, Білім және ғылым министрлігі мен Қызылорда облысының әкімдігіне талай рет депутаттық сауал жолдап, хат жазғанымен, оларға орталық және жергілікті мемлекеттік органдардың бір-біріне сілтеген сырғытпа жауаптарын алып, жігерлері құм болған екен. Еліміздің бас газетінің сыни жарияланымы Президенттің көзіне түспесе, сексеуілдіктердің жанайқайы облыстық және орталық мемлекеттік органдардағы шенеуніктердің халық үніне әбден таскерең болып қалған құлақтарына жетуі неғайбіл еді.
Өкінішке қарай, олардың құлақтарының «мүкісі» Мемлекет басшысы 2019 жылғы 1 қыркүйекте жариялаған «Сындарлы қоғамдық диалог – Қазақстанның тұрақтылығы мен өркендеуінің негізі» Жолдауында «Халық үніне құлақ асатын мемлекет» тұжырымдамасын ұсынғаннан кейін де ашылып кете қойғаны шамалы секілді. Бұған Мәжіліс депутаты Мейрамбек Төлепбергеннің былтырғы 29 желтоқсанда Вице-Премьер Ералы Тоғжановқа жолдаған депутаттық сауалы айғақ.
«2021 жылғы 2 қарашада Парламент Мәжілісінің депутаттары Сіздің атыңызға депутаттық сауал жолдаған болатынбыз. Онда жалпы білім беретін қазақ мектептерінің 4-сынып оқушыларына арналған «Русский язык» оқулығында жіберілген қателіктер жөнінде жазғанбыз. Атап өтсек, 2019 жылы «Алматыкітап» баспасынан 260 мың таралыммен шыққан оқулықта Мемлекеттік рәміздер авторларының аты-жөнінде өрескел қателіктер орын алған. Біріншіден, Мемлекеттік Тудың авторы Ш.Ниязбековтің тегі Ниязбаев деп жазылған, кейінгі екі жылда қайта басылған 40 мың таралымда бұл түзетілсе де, Мемлекеттік Гимн авторларының бірі, атақты композитор Ш. Қалдаяқов мүлдем енбей қалған.
Міне, осы мәселені көтеріп жазған депутаттық сауалымызға Білім және ғылым бірінші вице-министрі Ш. Кариновадан келген жауап қанағаттанарлықсыз деп айтуға тура келеді. Министрліктің жаңартылған білім беру мазмұнын енгізу басталғанын, үлгілік оқу жоспарлары мен бағдарламалары бекітілгені және тағы басқа іс-шаралардың қолға алынып жатқанын баяндаумен шектелген. Ал депутаттық сауалға негіз болып отырған мәселе – аталмыш оқулық, бүгінгі таңда сол оқулықта кеткен қателіктер қалай түзетіліп отырғаны туралы ештеңе айтылмаған. Бұл жөнінде бір ауыз сөз жоқ», депті мәжілісмен. Сенат депутаттары да осы мағыналас пікірде екен. Бұған сенатор Мұрат Бақтиярұлының Үкіметке биылғы 27 қаңтарда жолдаған депутаттық сауалында: «Үкімет басшысына, Үкімет мүшелеріне сенаторлар қоғамда әр түрлі салаға қатысты депутаттық сауалдар жолдап жатамыз. Бірақ алатын жауаптарымыз нақты болмай, екі ұшты болып келеді. Сондықтан да депутаттық сауалдарға бір жапырақ қағазбен ғана жауап қайтара салуға ендігі арада жол берілмегені абзал! Әр депутат сауалына зерделеп барып, жауап беру жолға қойылуы керек», дегені дәлел.
Демек «Егер Үкімет мүшелері депутаттарды тыңдамаса, онда кімді тыңдайды?» деген ой туындайды. Жаңа Қазақстанды құруға кіріскен жаңа Үкіметіміз ең алдымен Мемлекет басшысының «Халық үніне құлақ асатын мемлекет» тұжырымдамасын бұлжытпай іске асырғаны жөн емес пе? Ал Парламент депутаттарының артында сайлаушылар һәм халық тұрғаны мәлім.
