«Аманат сөзінің – мағынасы терең, халқымыздың тарихы мен мəдениетінде ерекше орын алады. Ол бабаларымыз өсиет еткен тəуелсіздіктің мəңгі арман-мұраты, қуатты мемлекеттіліктің жəне жалпыұлттық тұтастықтың, кең-байтақ Отанымыздың құндылығы ретінде сипатталады. Біз осы баға жетпес мұрамызды сақтап, нығайтуға тиіспіз. Бұл – біздің аға буын мен өскелең ұрпақ алдындағы қастерлі борышымыз. Сондықтан мен партиямызды ресми түрде «Аманат» деп атауды толық қолдаймын», деді Мемлекет басшысы.
Саяси партияның өзгеруі – қоғамда болып жатқан өзгерістердің бір бөлігі. Президент партияның атауы өзгеруімен қатар, оның ішкі құндылықтары да назарға алыну керек екенін, ішкі функционалдық жүйесі де қайтадан қаралуы керек екенін жеткізді. Себебі партиялық жүйе расымен де, мемлекеттік басқару жүйесін қайталап келеді. Яғни партия өзінің негізгі қызметінен ауытқып кетті деуге болады. Анығында саяси партияның негізгі қызметі қоғам мен биліктің арасындағы алтын көпір, ашық алаң болу еді. Сол себепті бұл өзгерістер ең алдымен, саяси партияның негізгі қызметіне қайтып келуіне, екіншіден, жаңа заманға сай тәсілдерді қолдана бастауға бағытталуға тиіс. Талқыланатын мәселелер әлеуметтік желілерде, ашық алаңдарда емес, институционалды мемлекетте бар институттар арқылы жүзеге асуы керек. Сондықтан баса назарды Президент Парламент пен мәслихаттарға аударды. Бұлар тек формалды ресурс емес, адамдардың негізгі мақсаттарына, құндылықтарына жұмыс істеуге тиіс. Ендеше бұл тек формалды өзгерістер емес, сапаны жақсартуға бағытталған қадамдар.
«Партия аппаратының жұмысында бюрократияның теріс сипаттары анық көрінді. Желілік кестелер, есеп беру жəне қағаз жүзіндегі іс-шаралар сайлаушылармен тікелей жұмыс істеуді екінші орынға сырғытты. Жұмысқа құлшынып тұрған азаматтар өз орындарын дарынсыз функционерлерге беруге мəжбүр болды. Сондықтан орталық аппараттың филиалдармен жəне бастауыш партиялық ұйымдармен өзара іс-қимыл əдістерін толығымен қайта қарау қажет. Бюрократия мен қағазбастылықтан үзілді-кесілді бас тарту керек», деді Президент. Осылайша, партияның кадрлық жұмыс мәселесіне де баса назар аударылды. Шын мәнісінде, саяси партиялық жұмыс – қоғамдық жұмыс, қоғаммен, адамдармен, әртүрлі әлеуметтік топтармен істейтін қызмет. Себебі бұл қызмет өндіріс не болмаса шикізат айналасындағы жұмыс емес. Қоғамдық жұмыс дегеніңіз адамнан, қызметкерден өзгеше қасиеттерді талап етеді.
Мәселен, ондай қызметкерге жоғары коммуникация, білім, әртүрлі әлеуметтік топпен сөйлесуге қабілет қажет. Ойын ашық жеткізуі, адамдардың сана-сезіміне, құндылықтарына сай істейтін әрекеттері болуы керек. Партияның құндылықтары мен бағдарламасын елге жеткізе білуге және керісінше, қоғамның мұқтажын партияның ресурсы арқылы шешуге тырысуға, соған ұмтылуға тиіс. Сол себепті партияға кадр іріктеу кезінде осындай мәселелерге барынша мән берген жөн. Президент айтып өткендей, сонда ғана функционер емес, көзі жанып тұрған жалынды азаматтар жұмысқа нақты кіріседі.
Партия қоғамның бір институты ретінде, оның ішінде партиялық әлеуметтік лифттер болуы керек. Адамдар партияға біреудің мұқтаждығынан келмейді. Әрбір азамат менің ой-пікірім осы партиямен үндеседі, осы партия арқылы өзімнің пайымымды жеткізе аламын деген кезде ғана саналы түрде саяси институтқа қосылады. Сол себепті қазіргі өзгерістерден үлкен үміт күтеміз. Қоғамда бетбұрыс басталды. Бұдан былай әлеуметтік топтардың наразылығы алаңдарда емес, саяси институттарда айтылады деген үміттеміз. Бізде ондай институт бар. Тек жүйелі қолдана алмай отырмыз. Ендігі мәселе соны бір жүйеге келтіру болып отыр. Жаңа тәсілдерге, тың қадамдарға барған жөн. Орталық аппарат пен филиалдың арасындағы қарым-қатынас өзгеруге тиіс.
Айгүл СӘДУАҚАСОВА,
әлеуметтанушы
