![Корей ұлтының шынайы алғысының белгісі](/media/2022/03/04/bd9966fe-ac6c-4dbd-845a-e7b56657b956.jpg)
«Өткен ғасырдың 30-жылдарында корей халқының басына қандай ауыр тауқымет түскенін бәріміз білеміз. Корей ұлтының 100 мыңға жуық өкілі қақаған қыста жүк вагондарымен айдалаға жер аударылып келгенде, кеңпейіл қазақ халқы оларды жатсынбай бауырына басып, қиын-қыстау заманда көмек қолын созған еді. Бүгін біздің достығымыз бен ынтымағымыздың беріктігі – халқымызды біріктіретін айтулы оқиғаларды еске алып, өткен тарихты жадымызда сақтау. Сондықтан жаңа композицияның ашылуы біздің қоғамның өмірлік күші ынтымағымыз бен бірлігімізде екенінің тағы да бір айқын дәлелі», деді Марат Әзілханов.
ҚХА Төрағасының орынбасары акцияның бастамашыларына шынайы алғысын білдіріп «Ақтөбе облысының корейлер қауымдастығы» қоғамдық бірлестігінің төрағасы К.В.Цхайға «Халық алғысы» медалін табыстады. Сондай-ақ жоғары мәртебелі Корея елшісі Ку Хонг-сок мырза мен консул Ким Вон Йон ханымға екі елдің достығы мен ынтымақтастығын дамытуға әрдайым атсалысатындары үшін өзінің айрықша ілтипатын жеткізді.
Ақтөбе облысының әкімі О.Оразалин: «1930-1940-жылдардағы жаппай жер аудару кезеңінде түрлі этнос өкілдері халқымыздың қонақжайлылығының арқасында Қазақстанда баспана тауып, жаңа өмірге қол жеткізді. Ең сұрапыл аязда қазақ халқының қоныс аударушыларға деген шынайы қарым-қатынасы арқылы жан дүниелеріне жылулық сыйлады. Бүгінгі таңда сол қиын-қыстау кезеңде қолдау көрсеткен жер мен халыққа алғыс ретінде корей этносының өкілдері қазақ халқына өзара құрмет, сенім, достық пен барша қазақстандықтың бірлігінің нышанын бейнелейтін осы жарқын мүсіндік композиция түрінде шексіз құрмет көрсетті», деді.
Ку Хонг-сок құттықтау сөзінде: «Осыдан 85 жыл бұрын Сталин үкіметінің бұйрығымен корейлер Қиыр Шығыста пойызға отырғызылып Қазақстанға күштеп қоныс аударылған. Сол кезде Қазақстан халқы ашаршылық пен шаруашылықтың тоқырауы салдарынан қиын жағдайда болғанына қарамастан, корейлерге баспана, киім-кешек, азық-түлік жағынан көмек қолын созып, оларды жақын көрші, отбасы мүшесі ретінде қарсы алды. Бұл ескерткіштің ашылу салтанаты сол қилы заманда қазақ елінің корейлерге деген ынтымақтастығының асқақ рухын еске алып, құрмет көрсетудің белгісі», деді.
«Бұл мүсіндік композиция қазақ халқының жер аударылғандарға деген кеңпейілдігі мен мейірімділігін ашып көрсетеді», деді Константин Цхай қазақ еліне шынайы ризашылығын білдіре отырып.
Аталған туынды қазақ және корей әйелдерінің мүсінінен тұрады. Депортацияның қиын кезеңінде корей ұлтының мыңдаған өкілдерінің аман қалуына көмектескен қазақтардың қонақжайлығының символы ретінде қазақ әйелі корей әйеліне қымыз құйылған ыдысты ұсынып тұр. Әйелдер өздерінің ұлттық киімдерін киген. Корей әйелінің арқасында бала – бұл корей ұлтының балаларды алып жүруінің дәстүрлі тәсілі. Ақ құстың айшықты қанаттары қазақ ұлтының символы шаңырақты ұстап тұр. Әйелдердің арғы жағында шаңырақты ұстап тұрған ақ құстың айшықты қанаты – қазақтарға арналған үйдің нышаны. Шаңырақ күнді бейнелейді.
Осы күні Марат Әзілханов Ақтөбе облыстық ҚХА мүшелерімен, оның қоғамдық құрылымдарымен, ҮЕҰ өкілдерімен және «Жастар Ассамблеясы» жастар қанатымен кездесу өткізіп, жалпыұлттық бірлік пен келісім, жастардың бойындағы парасаттылық құндылықтарды қалыптастыру, қазақстандық патриотизмді дамыту мәселелері төңірегінде ой қозғады. Оған қоса Ассамблея жұмысының жаңа бағыттары бойынша ұсыныстар талқыланды.