Халықаралық әйелдер күніне арналған мерекелік іс-шаралардың басы аудандарда ғасыр жасаған әжелерді, көпбалалы аналарды құттықтаумен басталды. Мысалы, Ордабасы ауданының әкімі Бағлан Батыршаев 106 жасқа келген тыл еңбеккері Шамбек Рахманованы, 100 жастан асқан тыл ардагерлері Хлауда Кенелдіқызы, Кенже Өткелбаеваны, сондай-ақ Кеңес Одағының Батыры Қарсыбай Сыпатаевтың қызы Нағима Жүндібаеваны атаулы мерекемен құттықтады. Иықтарына орамал жауып, мерекелік гүл шоқтарын сыйлады.
Темірлан ауылындағы кенже қызы Алтынның қолында тұратын Шамбек әже 1916 жылы 1 қаңтарда дүниеге келген. Бүгінде 15 ұл-қыз тәрбиелеп өсірген алтын құрсақ ана немере, шөбере, шөпшек, неменесін қосқанда 150-ден астам ұрпақтың қазыналы ақылшысы. Ал Ұялжар ауылында тұратын Хлауда әже ел басына күн туған қиын кезеңде ер-азаматтармен қатар кетпен шауып, шиеттей бала-шағасын асыраған екен. «Хлауда анамыз жас кезінде өте еңбекқор болып, айналасына, әсіресе үлкендерге көмектесуді әдетке айналдырыпты. Міне, сол ауылдың аузы дуалы қарттарының «Жүз жаса, бақытты бол!» деген ақ батасының арқасында бүгінде жүзден асып, өсіп-өнген әулетке айналды», дейді әженің ұлы, Бөржар ауылдық ардагерлер кеңесінің төрағасы Данай Ережеп.
Қарияларға деген құрмет, оларға деген қамқорлық тек мерекеде ғана емес, үнемі жүргізіліп отыруы тиіс. Бұл орайда аудан әкімі аудандық орталық аурухананың бас дәрігері Бақытжан Мырзагелдиевке ауылдық округтердегі жүзден асқан қарттарға үнемі медициналық көмек көрсетіп, дәрі-дәрмекпен қамтамасыз ету жағын тапсырды. Ауылдық округ әкімдеріне қарттардың отбасылық жағдайын жиі қадағалап, қолдау көрсетуді жүктеді.
Жүз жасаған әжелерге Арыс қаласында да құрмет көрсетілді. Қала әкімі Гүлжан Құрманбекова 1922 жылдың 8 наурызында дүниеге келген Бибайша Тостанбекқызын үйіне барып, құттықтады.
Бибайша әже 2 ұл, 2 қызынан – 17 немере, 59 шөбере, 2 шөпшек сүйіп отырған жан. Жүзге келген кейуананың кенже ұлы – Қалдарбек Наматуллаұлының өзі келер жылы зейнетке шығады екен. Ал әже бүгінгі таңда үлкен ұлы – Рахматтулланың қолында тұрады. Оның жасы – 73-те. Бибайша әженің зайыбы – Наматулла қария ғасыр ауысқан шақта, яғни 2000 жылдары бақиға аттаныпты. Еңбек жолын жұмысшы болып бастап, іскерлігі бағаланып депутаттыққа сайланған оның көп жылғы еңбегі бағаланып, түрлі награда, медальдармен марапатталған.
Ал 90 жасқа толған Назгүл Әсілова – 11 баланы дүниеге әкелген батыр ана. Аяулы ана бүгінде 6 ұл, 5 қызынан – 52 немере, 58 шөбере, 6 шөпшек сүйіп отыр. Айта кетелік, бүгінде Арыс қаласында 2 513 көпбалалы ана бар. Оның ішінде «Алтын алқа» иегерлері – 568 болса, «Күміс алқа» иегерлері – 1 769, 176 ана «Батыр ана» медалі мен І және ІІ дәрежелі «Ана даңқы» орденінің иегері.
Мереке қарсаңында Бәйдібек ауданында көпбалалы 25 ана алтын мен күмістен алқа тақты. Аудан әкімі Ержігіт Шәріпбеков алтын құрсақты аналарды қабылдап, құттықтау лебізін білдірді. Ел демографиясына үлес қосып отырған ақ жаулықты 25 ананың 7-еуі – «Алтын алқа», 18-і – «Күміс алқа» иегері атанды. Жалпы, Бәйдібек ауданында 500-ге жуық «Алтын алқа» иегері және 1300-ге жуық «Күміс алқа» иеленген аналар тұрады. Сонымен қатар 200-ден аса «Батыр ана» мен 300-ге жуық І-ІІ дәрежелі «Ана даңқы» ордендерімен марапатталғандар бар.
Түркістан облысы
