Ол мектепке дейінгі жастағы барлық баланың ақыл-ой тәрбиесіне баса мән беріп, оның өзіндік әдістемесін жасап, бүгінде тәжірибеге енгізіп отыр. Өзі де саналы түрде бала тәрбиешісі болуды таңдап, мамандығына адалдық танытып келеді. Ұрпақ тәрбиесінің маңыздылығын бірінші жолға қойған маман он екі жылдан бері бір салада еңбек етуде. Еліміздің әл-Фараби, Абай Құнанбайұлы, Жүсіпбек Аймауытов және өзге де тарихи тұлғалардың бала тәрбиесі туралы өзекті ойларын негізгі темірқазық етіп алып, жүйелі жұмыс жүргізуде.
Жоғары санатты тәрбиеші өз сөзінде ақыл-ойдың дамуы баланың жасы мен тәжірибесінің молаюына байланысты екенін де атап өтті. Оның айтуынша, түрлі тәрбиелік құралдардың әсеріне байланысты баланың ойлау әрекетінде пайда болатын сан және сапалық өзгерістердің жиынтығы да ақыл-ойдың дамуына әсер етеді.
Сонымен қатар Айнұр Бекболатқызы сенсорлық тәрбие туралы да өз ойын айтты. Бұл бағыттағы бірқатар тәжірибесімен бөлісті.
«Бұл – түйсік пен қабылдаудың дұрыс бағытта дамуы. Баланың сенсорлық процестерінің дамуына мүмкіндік тудыратын іс-әрекеттің тиімді түрі – көркем сурет салу, сазбалшықтан және ермексаздан түрлі мүсіндер жасау, салынған суреттерді, өрнектерді қиып, желімдеу әрекеттері, бірлескен дидактикалық ойындар. Бұл педагогикалық басшылықпен ұйымдастырылған іс-әрекет болып есептеледі. Ақыл-ой тәрбиесі айналадағы тіршілік құбылыстары жайлы балаға дұрыс түсінік қалыптастыруға және танымдық-психикалық процестерді дамытуға баса мән береді», дейді тәрбиеші өз сөзінде.
А.Қожамқұлованың бұл салада жеткен жетістіктері де аз емес. Center of Excellence NIS Nazarbayev Intellectual Schools бойынша «Қашықтан оқуды үйренемін» тақырыбы аясында 40 сағат көлемін растайтын сертификатпен марапатталған. Сондай-ақ Нұр-Сұлтан қаласында өткен «Күз мезгілінің қызықты оқиғалар қамалы» ІІ республикалық байқауында «Сурет салу» номинациясы бойынша жүлдегер дайындағаны үшін І дәрежелі диплом алған. Бұдан өзге де байқауларда бала тәрбиесі туралы әдістемесімен топ жарып, жүлдегер атанып жүрген Айнұр Бекболатқызының «Құлпынай» кіші тобындағы шәкірттері де биік белестерден көрінуде. Мәселен, өткен жылы Нұр-Сұлтан қаласында өткен ІІІ Республикалық «Қыс тынысы» байқауында «Сурет салу» аталымы бойынша Мирас Жолдыхан 1-орынды жеңіп алса, «Менің сүйікті балабақшам» атты балалардың онлайн шығармашылық байқауында «Мен болашақ ғалыммын» номинациясы бойынша Нұрсая Тулеева І дәрежелі дипломмен марапатталған. Қазіргі кезде де көптеген шәкірт тәрбиелеп келеді.
Балалардың ақыл-ой тәрбиесін қалыптастыруды бірінші орынға қойып, сол тұрғыда талмай еңбек етіп келе жатқан білікті маман әрдайым өз білгенін жас тәрбиешілерге үйретуден жалықпайды. Бала тәрбиешісі болуды бақыт деп білген Айнұр Бекболатқызы еңбек етпей, биік нәтижелерге жету мүмкін емес екенін, мұның түп негізі жауапкершілікте жатқанын айтады.
«Тәрбиеші деген жас ұрпақтың бойына тәрбиенің алғашқы негіздерін қалыптастыра алатын адамгершілігі жоғары, мәдениет пен ғылым жетістіктерін дұрыс бағалай алатын, әдебиет пен өнердің, техниканың даму жағдайын білетін және оны балаларға түсіндіре алатын адам болуы керек. Тәрбиешінің бойында болатын ақылдылық, мәдениеттілік, кәсіби шеберлік, тәртіптілік пен балаларға деген сүйіспеншілік тәрбиеленушілерге әрдайым үлгі болуы керек деп ойлаймын», дейді А.Қожамқұлова.
Жамбыл облысы
