Аймақтар • 08 Наурыз, 2022

Ақжарқын қалай «Ақтәте» атанды?

249 рет
көрсетілді
6 мин
оқу үшін

Арқа төсінде кішілердің жасы үлкен әйел баласына қарата «тәте» деп үн қататыны бар. Ал айналаңа «Ақтәте» атану – екінің біріне бұйыра бермейтін бақ. Бүгінде Ақжарқын Тұрғанбайқызы Иманбаеваны Шет ауданында өзін жақсы таныған ағайын «Ақтәте» деп атайды. Қолындағы қызметіне қарап емес, бойындағы кісілік қасиеттерін құрмет тұтып солай дейтініне кейіпкердің өмір жолына үңіле отырып көз жеткіздік.

Ақжарқын қалай «Ақтәте» атанды?

 

Ақжарқын Тұрғанбайқызының өмірі күреске толы. Үш қызы – үш қызғалдағы жел­кілдеп өсіп келе жатқанында жеке өмірін­дегі ауыр сынаққа тап болды. Ол еске түссе, жүректі сыздатып, көңілге мұң ұяла­татын кездер еді. Әйтсе де, жаратылысынан қайсар келіншек тағдырдың басқа салғанын қасқайып тұрып қарсы алған.

«Өткен күнде белгі жоқ» деген рас-ау. Сол кездегі қиыншылық бүгінде көрген түстей ұмытылған. Қазір Ақжарқын Тұр­ған­байқызы – атырапқа аты шыққан білдей бір мекеменің білікті басшысы, аудан көлемінде абыройдың биігіне еңбегімен көтерілген іскер келіншек.

Өткен өмір жолына қарап отырса, қызықты күндерді де, сынаққа толы сәт­терді де артқа тастапты. Өзі Қызыл­орда қала­сында туып-өсті. Бой жетіп, ұядан ұш­қаннан бергі өмірді сүру Арқа төсінен бұйыртқан екен. Академик Е.Бөкетов атын­­дағы Қарағанды мемлекеттік универ­­ситеті­нің филология факультетін тәмам­дап, сол жерде лаборант болып екі-үш жыл жұмыс істеді. Одан кейін өмір жолы жас маманды Жезқазғандағы Ө.Бай­қоңыров атындағы университетке алып кел­ген еді. Осындағы филология факуль­тетін­­де әуелі оқытушы, сонан кейін декан­­ның орынбасары болып жемісті қызмет етті.

Жылжып 2004 жыл да жеткен. Бұл жыл Ақжарқын үшін тағдыршешті, өміріне түбегейлі бетбұрыс әкелген құт­ты жыл бол­ды. Тағдырдың жазуы ғой: Боран­бай Жұм­кин есімді азаматпен табысып, отау құр­ды. Ал бұл кісі Шет өңірінде жақ­сы аты шық­қан, ұзақ жылдар ауданда бас­шы­лық қыз­меттер атқарған қайраткер тұлға болатын.

«Басқа түссе баспақшыл» деген, қала­ның қызына ауылдық жерге келісі­мен сиыр сауып, құрт қайнатып, май шай­қау­ды меңгеруге тура келген. Сөйтіп үй шаруа­шы­лығына қарайлап, бір жылдай отырып қалды.

Ал 2005 жылы аудан орталығындағы «Шет-Көмек» несие серіктестігіне маман болып жұмысқа тұрды. Есеп-қисапқа құ­рылған, қағаз-құжаты көп күрделі жұмысты бір кісідей меңгеріп әкеткені де рас-тын.

Арада он шақты жыл өткенде қатар­дағы маманнан серіктестіктің басшысына дейінгі деңгейге көтерілді. Ұйымның 2017 жылы өткен жалпы жиналысында Ақ­жарқын Тұрғанбайқызы «Шет-Көмек» несие серіктестігінің басқарма төрайымы болып сайланды.

Иә, «Шет-Көмек» несие серіктестігінің өркен жайып дамуына серпін берген себеп­тің бірін ұйымның басшылығына іскер келіншек Ақжарқын Иманбаеваның келуі­мен байланыстыруға болады. Мыса­лы, серік­тестік ауыл шаруашылығы нысан­дары­­на несие беру қарқынын екі жарым есе­ге көбейтіп, 2018-2019 жылдары 100-ге тар­та шаруа қожалығына 250 млн тең­ге­нің көлемінде қаржы беруді қамтамасыз еткен. Ал бүгінде «Шет-Көмектің» 186 қаты­су­шысы бар. Оларға берілген несие-займ­ның көлемі 1 млрд 477 977 мың теңгені құрайды.

Иә, үнемі өсу жолындағы мекеме 2019 жылдың 1 қаңтарындағы мәлімет бойынша 52 шаруа қожалығына 505,4 млн теңге несие беріп, бұл көрсеткіш жағынан Қара­ған­ды облысында үшінші орынға табан тіреді. Ал былтыр «Шет-Көмектің» рейтинг­тік көрсеткіші жоғары «А» тобына жатқы­зылып, еліміз бойынша несие серіктестері арасында топ бастаушылар қатарына енді.

«Банктерді ауыл тұрғындарының кепіл­дік ретінде ұсынатын мал-мүлкі аса қызық­тыра бермейді, оларға керегі – жылжымай­тын мүлік. Ал біздің «Шет-Көмек» борыш­­кер­­лер­дің мал-мүлкін қажетті құжат­тар­мен рә­сімдеп, олардың нарықтағы баға­сын шы­ғарып, сол бойынша несие алуға бар­лық мүм­кіндікті жасайды», дейді А.Иманбаева.

Іскер адам үшін айналасындағы әріп­тес­­­тік қарым-қатынаста жүрген жандар­­дың пікірі өте маңызды. Осы орайда «Шалқар» шаруа қожалығының бас­шы­сы Шалқар Сағындықұлы біздің кейіп­керіміз турасында өзінің ойын бы­лайша білдірген. «Ақжарқын Тұрғанбай­қызы­мен жұмыс істеудің өзі – бір бақыт. Істің қиюын біледі, адамның тілін табады. Ол кісі ара­ласса, шешілмейтін мәселе, ілгері­­ле­­­мей­тін іс жоқ», дейді ол ағынан жарылып.

Ақжарқын Тұрғанбайқызы дегенде шағын ұжымның да шығарға жаны жоқ. Себеп – белгілі. Іскер келіншек қара­мағын­дағы әрбір қызметкердің бабын тауып, балаша мәпелеп жүреді. Осындай кісілік сүйіспеншіліктің жылуын сезінген ұжым да өзге жұрт сияқты Ақжарқынды «Ақтәте» деп риясыз көңілмен атайды.

«Ақжарқын Тұрғанбайқызы – адам­гер­шілігі мол, өте кеңпейіл және әділет­ті адам. Иә, жұмысқа келгенде талабы қатаң да шы­ғар. Бірақ ұжымның әрбір мүшесінің жағ­дайын жасауға, көңілін табуға келгенде, ол кісідей мейірімді жанды табу қиын», дейді несие серіктестігінің заңгері Гүлім Әлғожина.

Бүгінде Ақжарқын Тұрғанбайқызы –екі бірдей немеренің бақытты әжесі. Үш қызы да жоғары білім алып, қатарының алды болды. Қазіргі уақытта түрлі салада ел игілігі үшін еңбек етіп жүр.

«Борекем екеуміздің ендігі бар тілеуі­міз – осы балалардың амандығы», дейді атына заты сай аяулы ана, адал жар, білік­ті басшы Ақжарқын Тұрғанбайқызы.

 

Қарағанды облысы,

Шет ауданы