Құрманғазы ауданында 5 наурыздан бері электр энергиясындағы ақау әлі толық қалпына келтірілген жоқ.
«Жөндеу жұмыстарын жүргізудің нәтижесінде Құрманғазы ауданының орталығындағы шағын аудандарға электр энергиясын кезең-кезеңмен беру іске асырылды. Қазір Құрманғазы, Байда, Орлы, Шортанбай, Дыңғызыл, Қиғаш, Сүйіндік, Асан, Азғыр, Нұржау, Жаңаталап, Теңіз, Кудряшов, Еңбекші, Мақаш, Сафон, Ақкөл округтеріне ток көзі берілді. Ал, Көптоғай округінде құрамында 6 адам, 4 техника бар 1 бригада, Бірлік ауылдық округінде 3 бригаданың құрамында 14 адам мен 3 техника электр энергиясын, кейбір елді мекендерде электр және байланыс желілерін қалпына келтіру жұмыстарын жалғастырып жатыр. «Қазақтелеком» АҚ-ның 27 стансасының 20-сында байланыс орнатылды», деп хабарлады аудындық әкімдік таратқан ақпаратта.
Құрманғазы ауданында электр желілерін қалпына келтіру жұмыстарына «Атырау-Жарық» АҚ-ның 8 бригадасы (56 адам, 20 техника) және «Қазақстан теміржолы» АҚ электрмен қамту бөлімінің 1 бригадасы (15 адам, 6 техника) жұмылдырылып отыр.
«Табиғи апаттың салдарынан бір 22 метрлік 35 кВТ, алты 22 метрлік 10 кВТ, 400-ге жуық 11 метрлік 10 кВТ электр бағанасы құлаған. Осыған байланыстты медицина мекемелері мен өзге де әлеуметтік маңызы бар нысандарда уақытша дизель генераторы іске қосылған», деп хабарлады өңірлік коммуникациялар қызметі.
