Орталық азаматтардың жекелеген санаттарына, оның ішінде көпбалалы, толық емес және әлеуметтік аз қамтылған отбасыларға, мүмкіндіктері шектеулі балаларды тәрбиелеп отырған ата-аналарға және т.б. «бір терезе» қағидаты бойынша консультациялық қызметтер кешенін ұсынады. Онда отбасының әлеуметтік проблемаларын кешенді шешу жүзеге асырылады. Атап айтқанда, әлеуметтік қолдауды қажет ететін отбасылар анықталады, өмірлік қиын жағдайдың себептері анықталады, оны жеңуге көмек көрсетіледі, әлеуметтік қорғаудың әртүрлі мәселелері бойынша кеңестер беріледі және т.б.
«Отбасының әлеуметтік мәселелерін шешудегі кешенді тәсіл «Жанұя» орталығының базасында мемлекеттік және квазимемлекеттік сектор мекемелерінің қызметін ұйымдастыру арқылы жүзеге асырылады. Қала тұрғындары мен мемлекеттік органдар арасындағы Бірыңғай диалог алаңында «бір терезе» қағидаты бойынша 7 мемлекеттік орган мен квазимемлекеттік мекемелердің 15 қызметі біріктірілген. Олардың қатарында – білім басқармасы, қоғамдық денсаулық сақтау басқармасы, халықты жұмыспен қамту орталығы, тұрғын үй және тұрғын үй инспекциясы басқармасы, «Отбасы банкі» бар», деп атап өтті Әсемгүл Садыр.
Орталық мамандары өмірлік қиын жағдайда жүрген әрбір отбасыға жеке көңіл бөледі. 2021 жылы 432 отбасы тексеріліп, 289 отбасы әлеуметтік сүйемелдеу жұмысына қабылданды. Сонымен қатар орталықта заңгерлерден, психологтерден кеңес алуға болады, сол сияқты өмірлік қиын жағдайға тап болған отбасыларға әлеуметтік қолдау көрсетіледі. Аналитикалық мәліметтерге сәйкес, ашылған күнінен бастап – 2019 жылдан бері орталыққа психологиялық көмек алу үшін 798, заңгерлік көмек үшін 5 090 адам жүгінген, 1 800-ден астам азаматқа әлеуметтік көмек көрсетілген.
«Жанұя» орталығында цифрлы сауаттылықты арттыру және әлеуметтік қызметтер порталы арқылы өзіне қызмет көрсету мүмкіндігін жасау мақсатында әлеуметтік аз қамтылған, көпбалалы отбасылар, мүмкіндігі шектеулі балаларды тәрбиелеп отырған адамдар үшін өзіне-өзі қызмет көрсету секторы ұйымдастырылды. Портал қызметтері бойынша 18 мыңнан астам өтінішке қызмет көрсетілді.
«Ашылған күннен бастап орталыққа барлығы 114 921 сұрақ бойынша 110 266 адам жүгінді. «Халық үніне құлақ асатын мемлекет» тұжырымдамасын жүзеге асыру, әлеуметтік шиеленісті азайту, жергілікті атқарушы органдар арқылы мемлекеттік аппарат қызметінің тиімділігін арттыру мақсатында, жалпы, орталық базасында бекітілген кесте бойынша санитарлық нормаларды сақтай отырып, апта сайын бірінші басшылар, мемлекеттік мекемелер басшыларының орынбасарлары, қалалық мәслихат депутаттары азаматтарды қабылдады», деді орталық директоры.
