Бавариядағы Қазақстан экономикасы күні

Мюнхен қаласында Қазақстанның Германиядағы елшілігінің, Бавария Экономика және технологиялар министрлігі мен Сауда-өнеркәсіптік палатасының қолдауымен ұйымдастырылған «Бавариядағы Қазақстан экономикасы күні» өтті. Шараның басты мақсаты Елбасының биылғы Жолдауы шеңберінде неміс инвестициялары мен технологияларын Қазақстан экономикасына тарту бойынша Бавариямен ынтымақтастықты кеңейту болып табылады. Іс-шараға федералдық жерлердің ресми және экономикалық топтарының 200-ден аса өкілдері, сондай-ақ, Баварияда орналасқан ірі концерндер мен компаниялардың басшылары қатысты. Өз сөзінде Қазақстанның Германиядағы елшісі Нұрлан Оңжанов қатысушыларға Қазақ­стан экономикасы дамуының өзек­тілігі және елдегі қолайлы инвестициялық жағдай туралы, сонымен қатар, 2010-2014 жылдарға арналған Қазақстанның үдемелі индустриялық-инновациялық бағ­дарламасын іске асыру барысында Қазақстан Үкіметінің қол жеткізген аралық нәтижелері туралы хабардар етті. Ол Баварияның іскер топтарын Қазақстанмен өзара тиімді әріптестікті тереңдетуде және кеңейтуде қолда бар мүмкіндіктер мен қолайлы жағдайларды бел­сен­дірек қолдануға шақырды. Елшінің пікірінше, Қазақстан үшін отандық экономикаға жа­ңа технологиялар мен ноу-хау трансфертін қарастыратын, қазақ­стандық білікті техникалық мамандарды даярлайтын қазақ­стандық экономиканың басым салаларындағы бірлескен инвес­тициялық жобалар ерекше қызығушылық тудыруда. Сондай-ақ, Германияның бұ­рынғы экономика және технология федералды министрі Михаэль Глос, Баварияның Экономика кеңесінің төрағасы Отто Висхой, Бавария экономикасының бір­лестігі төрағасының орынбасары Штефан Альбат, Қазақстанның Индустрия және жаңа технологиялар министрлігінің Инвестициялар жөніндегі комитетінің төрағасы Ерлан Хаиров, Қазақстан Сауда-өнеркәсіп палатасының президенті Сабыр Есімбеков және «НАТР» АҚ басқарма төрағасы Айдын Құлсейітов тақырыптық баяндамалар жасады. Экономика күні шеңберінде өткен «Шикізат, өндірістік және тех­нологиялық әріптестіктің, сон­дай-ақ, жобалық-инжиниринг қыз­меті саласындағы ынты­мақ­тастықтың жағдайы мен болашағы» тақырыбындағы панельдік пікір­талас барысында Қазақстан мен Германия арасындағы тиімді шикізат, индустриялық және тех­­но­­логиялық әріптестікті әрі қарай реттеу мәселелері тал­қы­лан­ды. Бавариялық қаты­сушы­лар Германияның энер­ге­тика­лық қауіпсіздігін қамта­масыз етудегі Қазақстанның маңыз­ды рөлін, сонымен қатар, Қазақ­станның қазақстандық экономи­каны жаңарту және индустрия­ландыруға бағытталған мемле­кет­тік бағдарламаларды жүзеге асыруға байланысты неміс жоғары технологиялық компанияларына ұсынып отырған мүмкіндіктерін атап өтті. Экономика күнінің шеңберінде Дина Нұрпейісова атындағы Атырау мемлекеттік облыстық филармониясы академиялық оркестрінің мерекелік концерті өтті. «Егемен-ақпарат».