Негізі бұл жарыстың жолдамасына төрт спортшымыз иелік еткен еді. Олар – Ольга Сафронова (60 метрге жүгіру), Давид Ефремов (60 метрге кедергілер арқылы жүгіру), Михаил Литвин (400 метрге жүгіру) және Надежда Дубовицкая (биіктікке секіру). Алайда Белградта тек үш жерлесіміз ғана бақ сынайды. Ұлттық командамыздың бас бапкері Дмитрий Карповтың айтуынша, Сафронова биыл АҚШ-тың Орегон қаласында жалауы желбірейтін әлем чемпионаты мен Қытайдың Ханчжоу қаласында алауы тұтанатын жазғы Азия ойындарына тыңғылықты даярлануды жөн көрген екен.
Естеріңізге сала кетейік, жабық ғимараттағы әлем чемпионаты 1985 жылдан бері ұйымдастырылып келеді. Қазақстандық жеңіл атлеттер арасында кезінде Игорь Потапович, Ольга Шишигина, Григорий Егоров, Дмитрий Карпов және Ольга Рыпакова жеңіс тұғырына көтерілген.
