Мұндағы мамандар кәсіпкерлердің өтініші бойынша бизнеске талдау жүргізіп, оның даму әлеуетін анықтап бере алады. Бизнес ашуға ниетті немесе кәсібін кеңейткісі келетін әйелдер де осы орталықтағы түрлі тренингтер мен семинарларға қатысу арқылы кәсіпкерлік саласындағы білімдерін жетілдіреді.
Орталықтың ашылу салтанатына облыстық кәсіпкерлер палатасы өңірлік кеңесінің төрағасы Айдарбек Ходжаназаров қатысып, облыс экономикасында өсім бар екенін, осыған орай әйелдер бизнесінің де әлеуеті жоғары екенін айтты.
Ал Қостанай облыстық кәсіпкерлер палатасының директоры Данияр Күзенбаевтың пайымынша, жұмысын жаңа бастаған орталық әйелдерге шығармашылық және кәсіпкерлік мүмкіндіктерін іске асыруға жағдай жасайды.
Палата жанынан жұмыс істейтін іскер әйелдер кеңесінің төрайымы Елена Венгерская қазір өңірде ауыл әйелдерінің көптеп кәсіпкерлікпен айналысуына жол ашатын «Бір ауыл – бір өнім» жобасының жүзеге асырылып жатқанын айтты.
– Біз облыстың оншақты өңірін аралап, жаңа кәсіп ашқысы келетін, бірақ ісін неден бастайтынын білмей отырған қыз-келіншектермен, жалғызбасты аналармен кездесіп, әңгімелесіп қайттық. Ауылдық елді мекендерде көкөніс өсіргісі келетін, балабақша ашқысы келетін, сондай-ақ жергілікті жерде өнім шығарғысы келетін әйелдер көп. Жаңа кәсіпорын пайда болса, жаңа жұмыс орындары ашылатыны бәрімізге белгілі. Баламен үйде отырғанымен, үй шаруашылығынан тыс уақытта қосымша табыс тауып, ол ісін сүйіп істейтін ермегіне айналдырып алған әйелдер де аз емес. Олардың өз ісін әрі қарай дамытып, тұрақты кәсіпке айналдырғысы келетініне көзіміз жетіп отыр. Алайда көп әйелдердің жаңа кәсіп ашуға бастапқы білімі, ерік-жігері жетпей қалып жатады. Олар жаңа кәсіп ашып, оны әрі қарай дамытып, аяқтан тұрып кеткенше қолдау көрсету керек. Ол үшін барлық аудан орталықтарында осындай қолдау орталықтары ашылуға тиіс. Сонда ғана шалғай өңірлердегі қарапайым әйелдер кәсіпкерлікке көптеп бет бұра бастайды, – деді Е.Венгерская.
Орталықтың ашылу рәсіміне ауылдан келген кәсіпкер әйелдер де қатысты. Мысалы, Алтынсарин ауданынан келген жеке кәсіпкер Жәния Жармұхамбетованың ауылда сән салоны мен бірнеше дүкені бар.
– Мұндай орталықтың ісін жаңа бастап жатқан кәсіпкерлерге ғана емес, біз сияқты сақа кәсіпкерлерге де көп көмегі тиеді. Мысалы, мені соңғы кездері кәсібімді кеңейту туралы мәселе көп толғантып жүр. Орталық мамандары таяуда ғана біздің ауданның жергілікті тұтынушылық әлеуеті мен менің жеке бизнесіме салыстырмалы талдау-сараптама жасап, кәсібімді қандай бағытта дамытуға болатыны туралы көңілге қонымды ақыл-кеңестерін айтты, – деді іскер әйел.
Әйелдер кәсіпкерлігін дамыту орталықтары бүгінде еліміздің 14 өңірінде жұмыс істеп жатыр.
Қостанай облысы
