IT байқауының қорытындысы шықты

Сайыс Satbayev university-де офлайн форматта өтті. Жарысқа қа­тысуға еліміздің барлық өңірі­нен 107 команда өтініш берді. 230 студенттен құралған 72 команда финалға жолдама алған. Нәтижесінде, 15 студенттен құ­рал­ған 4 команда жеңімпаз атанды. Олар 3,5 млн теңгені бөлісті. Марапаттау рәсіміне қатысқан Білім және ғылым министрі Асхат Аймағамбетов қатысушылардың ұсынған жобалары өте қызықты болғанын жеткізді.

«Қатысушылар білім беру саласында өте қызықты цифр­лық жобаларды ұсынды. Же­ңім­паз студенттер ақшалай сый­лықтармен қоса, байқауды өткі­зу­ге қолдау білдірген Daryn online, BTS Education, EDUS және Mail.kz және басқа да қазақстандық IT-компанияларда жұмысқа орналасу мүмкіндігіне ие болды. Сонымен қатар кейбір цифрлы шешімдер өз инвес­торларын тауып үлгерді», деді А.Аймағамбетов.

Министрліктің мәлімдеуінше, қазылар алқасының шешімімен Nazarbayev University және Astana IT University студенттері же­ңім­паз атанды. Олар өзара 1,5 млн тең­гені бөлісті. Екінші орынды На­зарбаев университетінің тағы бір командасы жеңіп алды. Олар 1 млн теңгені жеңіп алды. Үшінші орын Ғ.Дәукеев атындағы Алматы энергетика және байланыс университетінің, Suleyman Demirel University және Astana IT University студенттерінен құрал­ған қос командаға бұйырды. Екі команданың әрқайсысы 500 мың теңгеден сыйақы иеленді.

BILIM Hackathon 2022 IT байқауында үшінші орынды иеленген Suleyman Demirel University студенттері жарысқа мүм­кіндігі шектеулі оқушылар мен студенттерге арналған жоба­ла­­рын ұсынды. 2-курс студенті Қажымұқан Рейм­баев­тың ай­туын­ша, олар бұл идеяны 24 сағатта ойлап тапқан.

«Жарыста ұсынған жобамыз мүм­кіндігі шектеулі жандарға ар­налған. Мектеп оқушылары ар­найы қолғапты киіп, ым-ишара арқылы ойын жеткізеді. Біз ойлап тапқан құрылғы олардың ойын түсінікті тілге айналды­рып береді. Тағы бір идеямыз зағип жандарға арналған. Оқу­шылар мен студенттер үшін оқу­лықтағы әріптерді Брайль шри­фіне айналдыратын құрылғы мен қосымша ойлап таптық. Бұл жобаларды ойлап табу үшін бізге 24 сағат уақыт берілді. Жа­рыста 72 команданың ішінде ІІІ орын алып, 500 мың теңге ұтып алдық. Алдағы уақытта жо­ба­ла­рымызды іске асырамыз», дей­ді «Ақпараттық жүйелер» ма­ман­ды­ғының студенті.

2022 жылдың 26-27 наурызында өткен cайыстың жеңімпаз­да­рын Білім және ғылым ми­нистрі Асхат Аймағамбетов ма­рапаттады. Байқау білім мен ғылым сала­сын­­да жаңа IT жобаларды жасауға бас­тамашы болу, IT мамандарды ынталандыру мақсатында ұйымдастырылды.