Мемлекеттік кірістер комитеті 2021 жылдың көлік салығын биылғы 1 сәуірге дейін төлеу керектігін еске салады. Комитеттің баспасөз қызметінің хабарлауынша, көлік құралдарына салынатын салықтың көлемін kgd.gov.kz web-порталы мен «e-Salyq Azamat» мобильді қосымшасындағы салық калькуляторының көмегімен есептеп шығаруға болады.
«Қазіргі уақытта салық органдары есептеген көлік салығының сомасы «Каспий банк» АҚ және «Халық банк» АҚ мобильді қосымшаларын пайдаланушыларға PUSH-хабарлама түрінде жіберіліп жатыр. Бұдан басқа, бұл ақпарат kgd.gov.kz web-порталында «Жеке тұлғалар үшін алдағы төлемдер» сервисінде, сондай-ақ «e-Salyq Azamat» және екінші деңгейдегі банктердің ұялы телефон қосымшаларында жарияланды», делінген комитеттің ресми хабарламасында.
Егер салық уақтылы төленбесе, онда салық органдары жеке тұлғаға салық берешегі туралы қосымша хабарлама жолдайды. Осы хабарлама табыс етілген күннен бастап отыз жұмыс күні өткен соң тиісті ведомство бір еселенген айлық есептік көрсеткіш (3 063 теңге) мөлшерінде салық бұйрығын шығарады. Ал осы бұйрық табыс етілген күннен бастап 5 жұмыс күні ішінде берешек өтелмесе, онда төлемді мәжбүрлеп өтеп алу үшін іс жеке сот орындаушыларына жіберіледі. Қарызгер үстеме ақшамен қоса, сот орындаушыларының қызметі үшін де қосымша ақша төлеуіне тура келеді. Олар борышкер азаматтан салық берешегі сомасының 25%-ына дейін төлем өндіріп алады. Оның сыртында жеке тұлғаның шоты бұғатталып, депозитіне шектеу қойылуы мүмкін.
Сондықтан салық органы қызметкерлері көлігі бар азаматтарды мемлекет алдындағы міндеттемесіне адал болып, салықты уақтылы төлеуге шақырады.
